សាក្សី ៖ ហ្វូងមនុស្សក្នុងបុណ្យ Halloween គិតថា ជាការសម្ដែងជាន់គ្នា​ស្លាប់ ទើបរាំសប្បាយនៅមុខរថយន្តសង្គ្រោះបន្ទាន់

សាក្សី​​សុំ​មិន​បញ្ចេញ​ឈ្មោះម្នាក់ដែល​បានឃើញហេតុការណ៍ជាន់គ្នាដែលបានសម្លាប់មនុស្ស ១៥៤ នាក់នៅតំបន់​ Itaewon និយាយ​ថា ហ្វូងអ្នកចូលរួមក្នុងពិធីបុណ្យ Halloween កំពុងរាំសប្បាយនៅមុខរថយន្តសង្គ្រោះបន្ទាន់ ខណៈដែលក្រុមសង្គ្រោះបន្ទាន់បានប្រញាប់ប្រញាល់ទៅជួយសង្គ្រោះជនរងគ្រោះ ។

សាក្សីបាននិយាយថា “នៅពេលនោះ មនុស្សជាច្រើនគិតថា វាជាការសម្តែងសម្រាប់ពិធីបុណ្យ Halloween ប៉ុណ្ណោះ មិនមែនជាការសង្កត់ជាន់គ្នាស្លាប់មែនទែននោះឡើយ បើទោះបីជាក្រុមអ្នកសង្គ្រោះបានដល់កន្លែងកើតហេតុ ដើម្បីអនុវត្តការធ្វើចលនាបេះដូង និងដង្ហើម ក៏ដូចជាឮសំឡេងស្រែកឲ្យជួយក៏ដោយ” ។

សាក្សីបញ្ជាក់ទៀតថា “ខ្ញុំមិនដែលឃើញហ្វូង​មនុស្ស​ដ៏ច្រើនលើសលុបបែបនេះពី​មុន​មក​ទេ ។ ខ្ញុំមានអារម្មណ៍ថា ហ្វូងមនុស្សនៅផ្លូវដែលមានប្រវែង ៤៥ ម៉ែត្រ និងទទឹង ៤ ម៉ែត្រ គឺខុសពីពេលផ្សេងៗទៀត” ។

សាក្សីបញ្ជាក់ទៀតថា ភាគច្រើននៃហ្វូងមនុស្សនៅកន្លែងកើតហេតុ គឺជាមនុស្សធម្មតាដែលបានជួយជីវិតមនុស្សឲ្យនៅរស់ ប៉ុន្តែបានបដិសេធមិនចែករំលែកអត្តសញ្ញាណ និងរូបថតរបស់ពួកគេនោះទេ ។

គួរបញ្ជាក់ថា មនុស្សប្រហែល ១០ ម៉ឺននាក់បានទៅលេងតំបន់ Itaewon ដែលជាសង្កាត់ដ៏ពេញនិយមបំផុតមួយក្នុងទីក្រុងសេអ៊ូល ដើម្បីប្រារព្ធពិធីបុណ្យ Halloween ពោលជាលើកដំបូងនៅក្នុងរយៈពេល ៣ ឆ្នាំ បន្ទាប់ពីប្រទេសកូរ៉េខាងត្បូងបានដកការរឹតត្បិតពាក់ព័ន្ធជំងឺកូវីដ ១៩ ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ សាក្សី និងអ្នកនៅរស់ រៀបរាប់ពីហេតុការណ៍ មុនផ្ទុះការជាន់គ្នាស្លាប់នៅ កូរ៉េខាងត្បូង