អាមេរិក ត្រៀមបញ្ជូនយន្តហោះទម្លាក់គ្រាប់បែក B-52 ទៅ អូស្ត្រាលី ចំពេល​តានតឹងជាមួយ ចិន

យោធាអាមេរិកគ្រោងនឹងបញ្ជូនយន្តហោះទម្លាក់គ្រាប់បែក B-52 ប្រមាណជា ៦ គ្រឿងទៅកាន់​មូលដ្ឋាន​ទ័ព​អាកាស Tindal នៅភាគខាងជើងរបស់ប្រទេសអូស្ត្រាលី ចំពេលមានភាពតានតឹងជាមួយប្រទេសចិន ។

កងកម្លាំងទ័ពអាកាសអាមេរិកបានប្រាប់សារព័ត៌មាន ABC ថា “សមត្ថភាពក្នុងការដាក់ពង្រាយយន្តហោះទម្លាក់គ្រាប់បែក B-52 របស់កងទ័ពអាកាសអាមេរិកទៅកាន់ប្រទេសអូស្ត្រាលី គឺជាការសម្ញែងអំណាចដ៏ខ្លាំងក្លាមួយទៅកាន់សត្រូវ អំពីសមត្ថភាពដែនអាកាសដ៍សាហាវរបស់ខ្លួន” ។

ទំនាក់ទំនងរវាងសហរដ្ឋអាមេរិក និងចិនបានឈានដល់ចំណុចក្តៅថ្មីកាលពីដើមខែសីហា នៅពេលដែលប្រធានសភាលោកស្រី Nancy Pelosi ធ្វើដំណើរទស្សនកិច្ចមកកាន់កោះតៃវ៉ាន់ ។

មួយសន្ទុះបន្ទាប់ពីលោកស្រី Pelosi ចុះចតនៅទីក្រុងតៃប៉ិ ក្រសួងការបរទេសចិនបានគូសបញ្ជាក់ថា សកម្មភាពរបស់ប្រធានសភាអាមេរិករូបនេះ បានប៉ះពាល់យ៉ាងធ្ងន់ធ្ងរដល់ទំនាក់ទំនងដែលប្រេះស្រាំរួចទៅហើយរវាងសហរដ្ឋអាមេរិក និងចិន ។

ជិត ៣ ខែ បន្ទាប់ពីការធ្វើដំណើររបស់លោកស្រី Pelosi ទៅកាន់កោះតៃវ៉ាន់នេះ ក្តីបារម្ភនៅតែមានការកើនឡើងជាថ្មីម្តងទៀតអំពីរបៀបនៃការដាក់ពង្រាយយន្តហោះទម្លាក់គ្រាប់បែក B-52 ទៅកាន់ប្រទេសអូស្ត្រាលី ។

គួរបញ្ជាក់ថា កាលពីដើមឆ្នាំ​នេះ សហរដ្ឋ​អាមេរិកក៏​បាន​បញ្ជូន​យន្តហោះទម្លាក់គ្រាប់បែក B-52 ចំនួន​ ៤ ​គ្រឿងរួចទៅហើយ​ទៅ​កាន់​មូលដ្ឋាន​ទ័ពអាកាស Andersen របស់​ខ្លួន​នៅ​កោះ​ហ្គាំ ស្របពេលដែលកំពុងមានភាពតានតឹងជាមួយទីក្រុងប៉េកាំង ​ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ មេ ណាតូ ពន្យល់មូលហេតុដែលមិនអាចឲ្យ រុស្ស៊ី ឈ្នះជម្លោះនៅ អ៊ុយក្រែន