នាយករដ្ឋមន្ត្រីកូរ៉េខាងត្បូង៖ ប៉ូលិស ត្រូវតែពន្យល់ពីការឆ្លើយតប ទៅនឹងការហៅទូរស័ព្ទសង្គ្រោះបន្ទាន់ (មានវីដេអូ)

នាយករដ្ឋមន្ត្រីកូរ៉េខាងត្បូង លោក Han Duck-soo បាននិយាយនៅថ្ងៃពុធទី០២ខែវិច្ឆិកានេះថា ប៉ូលិសត្រូវតែពន្យល់ពីរបៀបដែលពួកគេឆ្លើយតប បន្ទាប់ពីទទួលការហៅទូរស័ព្ទបន្ទាន់ជាច្រើនម៉ោង និងប៉ុន្មាននាទីមុនហេតុការណ៍រត់ជាន់គ្នាអំឡុងពិធីបណ្យ Halloween ដែលបានសម្លាប់មនុស្សជាង ១៥០ នាក់នៅក្នុងទីក្រុងសេអ៊ូល។

សោកនាដកម្ម​កាល​ពី​យប់​ថ្ងៃ​សៅរ៍ទី២៩ខែតុលា ​បាន​សម្លាប់​មនុស្សចំនួន ១៥៦នាក់ និង​របួស ១៥១នាក់ ខណៈ ២៩នាក់​ស្ថិត​ក្នុង​ស្ថានភាព​ធ្ងន់ធ្ងរ។ ជនបរទេស ២៦ នាក់មកពី ១៤ ប្រទេសគឺស្ថិតក្នុងចំណោមអ្នកស្លាប់។

យុវជនរាប់ម៉ឺននាក់ បានប្រមូលផ្តុំគ្នានៅតាមផ្លូវដ៏តូចចង្អៀត ក្នុងតំបន់ពេញនិយម Itaewon ដើម្បីប្រារព្ធពិធីបុណ្យ Halloween លើកដំបូងក្នុងរយៈពេលបីឆ្នាំ។

លោក Han បាននិយាយនៅពេលចាប់ផ្តើម កិច្ចប្រជុំក្រុមការងារស្តីពីគ្រោះមហន្តរាយថា “ប៉ូលិសត្រូវតែធ្វើការត្រួតពិនិត្យឲ្យបានហ្មត់ចត់ ហើយផ្តល់ការពន្យល់ច្បាស់លាស់ និងតម្លាភាពដល់សាធារណជន”។

អត្ថបទចម្លងជាលាយលក្ខណ៍អក្សរនៃការហៅទូរស័ព្ទសង្គ្រោះបន្ទាន់ ដែលបញ្ចេញដោយប៉ូលិសកាលពីថ្ងៃអង្គារ បានបង្ហាញពីការព្រមានដំបូងនៃគ្រោះថ្នាក់ដែលអាចកើតមាន ពោលគឺប្រហែលជាបួនម៉ោង មុនគ្រោះមហន្តរាយកើតឡើង។

យោងតាមអត្ថបទនោះ, ប៉ូលិសបានទទួលការហៅទូរស័ព្ទស្រដៀងគ្នាចំនួន ១០ ផ្សេងទៀត មុនពេលភាពចលាចលប្រែក្លាយទៅជាហេតុការណ៍សម្លាប់មនុស្ស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖​ បុរសមួយក្រុម ត្រូវគេស្តីបន្ទោស ថាជាដើមហេតុ នាំឲ្យរត់ជាន់គ្នា នៅ កូរ៉េខាងត្បូង