ហេតុអ្វីលោក Biden បាត់ខឹងលោក Zelensky ពេលកំពុងនិយាយទូរស័ព្ទ?

យោងតាមការផ្សាយរបស់ទូរទស្សន៍ NBC News បានឲ្យដឹងថា ប្រធានាធិបតីសហរដ្ឋអាមេរិកលោក Joe Biden បាត់ខឹងលោក Volodymyr Zelensky ក្នុងអំឡុងពេលការហៅទូរស័ព្ទ ដើម្បីពិភាក្សាអំពីជំនួយយោធារបស់សហរដ្ឋអាមេរិកសម្រាប់អ៊ុយក្រែននៅក្នុងខែមិថុនា ។

ការរំសាយកំហឹងរបស់លោក Biden បានកើតឡើង អំឡុងពេលដែលប្រធានាធិបតីអាមេរិករូបនេះ បានប្រាប់លោក Zelensky តាមទូរស័ព្ទកាលពីថ្ងៃទី ១៥ ខែមិថុនា ឲ្យបង្ហាញពីការដឹងគុណសម្រាប់ជំនួយដែលរដ្ឋាភិបាលទីក្រុងកៀវកំពុងទទួលបានពីទីក្រុងវ៉ាស៊ីនតោន ។

ស្របពេលជាមួយគ្នានេះ មន្ត្រីរដ្ឋបាលរបស់លោក Biden បានប្រាប់បណ្តាញសង្គមថា ទំនាក់ទំនងរបស់មេដឹកនាំទាំងពីរ មានភាពប្រសើរឡើងក្នុងរយៈពេល ៤ ខែ ចាប់តាំងពីការហៅទូរស័ព្ទនោះមក ។

លោក Biden បានខឹងសម្បារយ៉ាងខ្លាំង នៅពេលដែលលោក Zelensky ជំរុញឲ្យប្រធានាធិបតីអាមេរិករូបនេះ ផ្ដល់ជំនួយបន្ថែមទៀត ទោះបីជាទើបតែបានអនុម័តថវិកាបន្ថែមចំនួន ១ ពាន់លានដុល្លារសម្រាប់អ៊ុយក្រែនក៏ដោយ ជាពិសេសគឺការថ្លែងជាសាធារណៈរបស់លោក Zelensky ថា ជំនួយរបស់អាមេរិកមិនទាន់បានមកដល់ក្នុងល្បឿន ឬគ្រប់គ្រាន់តាមការចង់បាននៅឡើយទេ ។

គួរបញ្ជាក់ថា រដ្ឋបាលលោក Biden បានផ្ដល់ជំនួយយោធាដល់រដ្ឋាភិបាលទីក្រុងកៀវប្រហែល ១៧.៦ ពាន់លានដុល្លារហើយ ចាប់តាំងពីផ្ទុះសង្គ្រាមលុកលុយរបស់រុស្ស៊ីលើអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ WION

ចុចអាន ៖ លោក Biden ចោទក្រុមហ៊ុនប្រេងធំៗ កំពុងកើបលុយចំណេញពីសង្គ្រាម