អាមេរិក អះអាងថា កូរ៉េខាងជើង កំពុងផ្គត់ផ្គង់ គ្រាប់កាំភ្លើងធំ ទៅឲ្យរុស្ស៊ី ដោយសម្ងាត់ (មានវីដេអូ)

អ្នកនាំពាក្យសេតវិមានលោក John Kirby បាននិយាយនៅថ្ងៃព្រហស្បតិ៍ទី ០៣ខែវិច្ឆិកានេះថា សហរដ្ឋអាមេរិក មានព័ត៌មានដែលបង្ហាញថា កូរ៉េខាងជើងកំពុងផ្គត់ផ្គង់ គ្រាប់កាំភ្លើងធំ ទៅឲ្យប្រទេសរុស្ស៊ី ដោយសម្ងាត់។

លោក Kirby បានប្រាប់សន្និសីទមួយថា កូរ៉េខាងជើង កំពុងព្យាយាមបិទបាំងការនាំចេញ ​ដោយបញ្ជូនគ្រាប់ទាំងនេះ ឆ្លងកាត់តាមប្រទេសនៅតំបន់មជ្ឈិមបូព៌ា និងអាហ្វ្រិកខាងជើង។

លោកបន្តថា “ការចង្អុលបង្ហាញរបស់យើងគឺថា កូរ៉េខាងជើង កំពុងផ្គត់ផ្គង់ដោយសម្ងាត់ ហើយយើងនឹងត្រួតពិនិត្យមើលថាតើ ការដឹកជញ្ជូនត្រូវបានទទួលឬក៏យ៉ាងណា។ ទីក្រុងវ៉ាស៊ីនតោន នឹងពិគ្រោះជាមួយអង្គការសហប្រជាជាតិលើបញ្ហានេះ”។

យោងតាមលោក Kirby, បរិមាណគ្រាប់ផ្លោងមិនសំខាន់ទេ ហើយក៏មិនទំនងជាផ្លាស់ប្តូរសម្ទុះ ឬលទ្ធផលនៃសង្រ្គាមដែរ។ ទោះបី​ជា​យ៉ាង​ណាក៏ដោយ វា​នៅ​តែ​អាច​ជា​គ្រោះ​ថ្នាក់​ដល់​ជន​ជាតិ​អ៊ុយក្រែន។

ការនាំចេញរបស់កូរ៉េខាងជើង គឺជាសញ្ញាមួយ មិនត្រឹមតែបង្ហាញពីឆន្ទៈរបស់ទីក្រុងព្យុងយ៉ាងក្នុងការគាំទ្រដល់រុស្ស៊ីប៉ុណ្ណោះទេ ប៉ុន្តែវាជាសញ្ញាបង្ហាញពីការខ្វះខាតអាវុធរបស់ទីក្រុងមូស្គូ ដែលកើតឡើងដោយសារការដាក់ទណ្ឌកម្ម និងការរឹតត្បិតការនាំចេញដែលដឹកនាំដោយសហរដ្ឋអាមេរិក។

ស្របពេលជាមួយគ្នានោះ អ្នកនាំពាក្យក្រសួងការបរទេសអាមេរិក លោក Ned Price បានស្នើឲ្យមានការដាក់ទណ្ឌកម្ម ដូចក្នុងករណីដែលអ៊ីរ៉ង់ផ្តល់អាវុធដល់រុស្ស៊ីដែរ។

លោកនិយាយថា “យើងកំពុងប្រើគ្រប់ឧបករណ៍ ហើយនឹងប្រើគ្រប់ឧបករណ៍ដើម្បីប្រឆាំងការផ្តល់អាវុធរបស់អ៊ីរ៉ង់ដល់រុស្ស៊ី។ យើងនឹងធ្វើដូចគ្នានេះ នៅពេលនិយាយអំពីការផ្តល់អាវុធរបស់កូរ៉េខាងជើងដល់រុស្ស៊ី”។

សហរដ្ឋអាមេរិកកាលពីខែកញ្ញា បានដាក់ទណ្ឌកម្មលើក្រុមហ៊ុនអ៊ីរ៉ង់ដែលខ្លួនចោទប្រកាន់ថា បានសម្របសម្រួលជើងហោះហើរយោធា ដើម្បីដឹកជញ្ជូនដ្រូនរបស់អ៊ីរ៉ង់ទៅកាន់ប្រទេសរុស្ស៊ី និងក្រុមហ៊ុនចំនួនបីផ្សេងទៀតដែលខ្លួននិយាយថា ជាប់ពាក់ព័ន្ធនឹងការផលិតដ្រូនរបស់អ៊ីរ៉ង់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ រុស្ស៊ី បញ្ជាក់ថា មានតែវិធីមួយគត់ ដែលអាចបញ្ចៀស សង្គ្រាមនុយក្លេអ៊ែរបាន