រុស្ស៊ី ឯកភាព ចូលរួមកិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែន ឡើងវិញ (មានវីដេអូ)

ប្រទេសរុស្ស៊ីនិយាយថា ខ្លួននឹងចូលរួមសាជាថ្មីក្នុងកិច្ចព្រមព្រៀងដែលគាំទ្រដោយអង្គការសហប្រជាជាតិ ដើម្បីអនុញ្ញាតឲ្យមានការនាំចេញគ្រាប់ធញ្ញជាតិពីអ៊ុយក្រែនតាមច្រករបៀងសមុទ្រខ្មៅប្រកបដោយសុវត្ថិភាព ខណៈការដឹកជញ្ជូនត្រូវបានគេរំពឹងថានឹងចាប់ផ្តើមឡើងវិញនៅថ្ងៃព្រហស្បតិ៍នេះ។

ក្រសួងការពារជាតិរុស្ស៊ីបានបញ្ជាក់ថា ទីក្រុងមូស្គូនឹងចូលរួមម្តងទៀត ដោយនិយាយថា ខ្លួនបានទទួលការធានាគ្រប់គ្រាន់ពីទីក្រុង កៀវ ថា ពួកគេនឹងមិនប្រើប្រាស់ច្រករបៀងសមុទ្រ សម្រាប់ប្រតិបត្តិការយោធាប្រឆាំងនឹងរុស្ស៊ីឡើយ។

ក្រសួងបន្តថា “ប្រទេសរុស្ស៊ីចាត់ទុកថា ការធានាដែលទទួលបាននៅពេលនេះគឺគ្រប់គ្រាន់ហើយកំពុងបន្តការអនុវត្តកិច្ចព្រមព្រៀង”។

គួរបញ្ជាក់ថា កិច្ចព្រមព្រៀងដែលត្រូវបានត្រួតពិនិត្យដោយមជ្ឈមណ្ឌលសម្របសម្រួលរួមនៅក្នុងទីក្រុងអ៊ីស្តង់ប៊ុល នៃប្រទេសតួកគី បានអនុញ្ញាតឲ្យគ្រាប់ធញ្ញជាតិជាង ៩.៧លានតោន និងគ្រឿងឧបភោគបរិភោគផ្សេងទៀត ចាកចេញពីកំពង់ផែអ៊ុយក្រែន។

នេះនឹងនាំមកនូវភាពធូរស្រាលយ៉ាងខ្លាំងចំពោះវិបត្តិស្បៀងអាហារពិភពលោក ដែលបង្កឡើងដោយការលុកលុយរបស់រុស្ស៊ីលើអ៊ុយក្រែន ដែលជាប្រទេសនាំចេញគ្រាប់ធញ្ញជាតិដ៏សំខាន់មួយ។

ក្រោមលក្ខខណ្ឌនៃកិច្ចព្រមព្រៀងដែលឈានដល់កាលពីខែកក្កដា កប៉ាល់ដែលធ្វើដំណើរទៅនិងមកពីប្រទេសអ៊ុយក្រែន នឹងត្រូវត្រួតពិនិត្យដោយក្រុមរួមនៃមន្ត្រីរុស្ស៊ី តួកគី អ៊ុយក្រែន និងអង្គការសហប្រជាជាតិ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Aljazeera

ចុចអាន៖ លោក Zelensky ឲ្យពិភពលោកជួយការពារច្រករបៀងគ្រាប់ធញ្ញជាតិ អ៊ុយក្រែន