ប៉ុន្មានម៉ោងទៅទើបប៉ូលិស កូរ៉េខាងត្បូង ទទួលដំណឹង ក្រោយហេតុការណ៍​ជាន់គ្នាស្លាប់

ប៉ូលិសកូរ៉េខាងត្បូងបាននិយាយថា មេរបស់ពួកគេទទួលបានការជូនដំណឹងដំបូងអំពីការជាន់គ្នាស្លាប់ អំឡុងពិធីបុណ្យ Halloween ដែលបានសម្លាប់មនុស្ស ១៥៦ នាក់កាលពីថ្ងៃសៅរ៍នៅទីក្រុងសេអ៊ូល គឺរយៈពេល ២ ម៉ោង បន្ទាប់ពីឧប្បត្តិហេតុនេះ ។

ទីភ្នាក់ងារប៉ូលិសជាតិបាននិយាយថា លោកស្នងការ Yoon Hee-keun ត្រូវបានគេជូនដំណឹងអំពីហេតុការណ៍សង្កត់ជាន់គ្នាស្លាប់ក្នុងតំបន់ Itaewon នៅម៉ោង ១២ និង ១៤ នាទីរំលងអធ្រាត្រឈានចូលថ្ងៃអាទិត្យ ។

នៅពេលនោះ ប្រព័ន្ធផ្សព្វផ្សាយកូរ៉េខាងត្បូង បានចាប់ផ្តើមរាយការណ៍អំពីគ្រោះថ្នាក់នេះរួចទៅហើយ ដោយនិយាយថា មនុស្សជាង ៥០ នាក់ទំនងជាកំពុងទទួលរងនូវការគាំងបេះដូង ។

ទន្ទឹមនោះ ការិយាល័យប្រធានាធិបតីនិយាយថា លោកប្រធានាធិបតី Yoon Suk-yeol ត្រូវបានជូនដំណឹងអំពីឧបទ្ទវហេតុនេះនៅម៉ោងប្រហែល ១១ យប់​ថ្ងៃ​សៅ​រ៏ ពោលគឺនៅមុនពេលដែលស្នងការប៉ូលិស ទទួលបានដំណឹងនេះទៅទៀត ។

ប្រព័ន្ធផ្សព្វផ្សាយកូរ៉េខាងត្បូងនិយាយថា ការឆ្លើយតបយឺតរបស់មន្ត្រីជាន់ខ្ពស់ ក៏ដូចជាប៉ូលិស ចំពោះភាពចលាចលនេះ អាចជាកត្តាសំខាន់នៅពីក្រោយការស្លាប់ដ៏ច្រើនក្នុងប្រវត្តិសាស្ត្ររបស់កូរ៉េខាងត្បូង ជាពិសេសគឺការហៅទូរស័ព្ទបន្ទាន់ជាង ១០ ដង និងជាច្រើនម៉ោង នៅមុនហេតុការណ៍នេះកើតឡើង ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ហេតុអ្វីបានជាស្ត្រីស្លាប់ច្រើនជាងបុរសក្នុងហេតុការណ៍ជាន់គ្នានៅ កូរ៉េខាងត្បូង?