ទីបំផុត ប៉ូឡូញ សង់របងខ្សែលួសប្រវែង ២១០ គីឡូម៉ែត្រជាប់ព្រំដែន រុស្ស៊ី

ប្រទេសប៉ូឡូញបានបញ្ជាឲ្យសាងសង់របងខ្សែលួសប្រវែង ២១០ គីឡូម៉ែត្រតាមបណ្តោយព្រំដែនរុស្ស៊ី-ប៉ូឡូញទាំងមូល ដើម្បីការពារលំហូរនៃជនចំណាកស្រុកអាស៊ី និងអាហ្រ្វិក ឆ្លងដែនខុសច្បាប់ចូលទៅក្នុងប្រទេសសមាជិកសហភាពអឺរ៉ុប តាមរយៈតំបន់ Kaliningrad របស់រុស្ស៊ី ។

រដ្ឋមន្ត្រីការពារជាតិប៉ូឡូញលោក Mariusz បានប្រាប់អ្នកយកព័ត៌មានកាលពីថ្ងៃពុធថា ផែនការនេះធ្វើឡើង បន្ទាប់ពីមានរបាយការណ៍ដែលថា តំបន់ Kaliningrad បានចាប់ផ្តើមទទួលយកជើងហោះហើរពីអាហ្វ្រិកខាងជើង និងមជ្ឈិមបូព៌ា ជាពិសេសគឺក្ដីបារម្ភអំពីការកើតឡើងម្តងទៀត នៃវិបត្តិជនចំណាកស្រុកដូចឆ្នាំ ២០២១ នៅតាមព្រំដែនជាមួយប្រទេសបេឡារុស ។

រដ្ឋមន្ត្រីការពារជាតិបាននិយាយថា ការសាងសង់របងនេះបានចាប់ផ្តើមកាលពីថ្ងៃពុធ ដោយមានការចូលរួមពីទាហានប៉ូឡូញដែលមានឯកទេសខាងដោះមីនផងដែរ ។

កាលពីឆ្នាំមុន ព្រំដែនរវាងប៉ូឡូញ និងបេឡារុស បានក្លាយជាកន្លែងផ្ទុះវិបត្តិដ៏ធំមួយ ខណៈដែលជនចំណាកស្រុករាប់ពាន់នាក់ បានព្យាយាមឆ្លងដែនខុសច្បាប់ចូលទៅក្នុងរដ្ឋសហភាពអឺរ៉ុប ។

ចាប់តាំងពីពេលនោះមក ទីក្រុង Warsaw បានសាងសង់ជញ្ជាំងដែកនៅតាមព្រំដែនជាមួយប្រទេសបេឡារុស ហើយបានចោទប្រកាន់ទីក្រុង Minsk ថា បានធ្វើសកម្មភាពដូចរុស្ស៊ី ដើម្បីធ្វើ “សង្រ្គាមកូនកាត់” ក៏ដូចជាសាបព្រួសភាពវឹកវរ និងធ្វើឲ្យមានការបែកបាក់នៅក្នុងសហភាពអឺរ៉ុប ។

ទោះយ៉ាងណា ទាំងប្រទេសរុស្ស៊ី និងបេឡារុស បានបដិសេធការចោទប្រកាន់ទាំងនេះ ហើយប្រធានាធិបតីបេឡារុស លោក Aleksandr Lukashenko បានពន្យល់ថា រដ្ឋាភិបាលរបស់លោកនឹងមិនជួយ EU ក្នុងការបញ្ឈប់ការធ្វើអន្តោប្រវេសន៍ខុសច្បាប់ទៀតនោះទេ ដោយសារតែប្រទេសរបស់លោក មិនមានថវិកាគ្រប់គ្រាន់ បន្ទាប់ពីការដាក់ទណ្ឌកម្មរបស់ប្លុកមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ អាមេរិក បញ្ជាក់ជាថ្មីរឿងថា រុស្ស៊ី ត្រៀមប្រើអាវុធនុយក្លេអ៊ែរនៅ អ៊ុយក្រែន