តម្រុយថ្មី បណ្ដាលឲ្យមនុស្សស្លាប់ច្រើននាក់ក្នុងហេតុការណ៍ជាន់គ្នានៅ កូរ៉េខាងត្បូង (មានវីដេអូ)

ប្រព័ន្ធផ្សព្វផ្សាយកូរ៉េខាងត្បូងរាយការណ៍ថា មន្ត្រីប៉ូលិសជាន់ខ្ពស់ដែលទទួលបន្ទុកផ្នែកសង្គ្រោះបន្ទាន់ បានអវត្តមានពីការិយាល័យពាក់ព័ន្ធក្នុងទីក្រុងសេអ៊ូល ទើបបណ្ដាលឲ្យមានជនរងគ្រោះច្រើនបែបនេះ ក្នុងហេតុការណ៍សង្កត់ជាន់គ្នាស្លាប់កាលពីសប្ដាហ៍មុន ។

ករណីនេះបានធ្វើឲ្យប៉ូលិសប្រឈមនឹងការរិះគន់កាន់តែខ្លាំងឡើង ដោយសារតែការខកខានរបស់ពួកគេក្នុងការឆ្លើយតបភ្លាមៗចំពោះការហៅទូរស័ព្ទពីមនុស្សនៅកន្លែងនោះ ។

ប៉ូលិសក្រុងសេអ៊ូលបាននិយាយថា ពួកគេបានទទួលការហៅទូរស័ព្ទពីកន្លែងកើតហេតុប្រហែល ៤ ម៉ោង មុនពេលឧបទ្ទវហេតុដែលបានសម្លាប់មនុស្ស ១៥៦ នាក់នៅតំបន់ស្រុក Itaewon កើតមានឡើង ខណៈអ្នក​ទូរស័ព្ទ​មួយ​ចំនួន​បាន​និយាយ​ថា ពួកគេ​ខ្លាចសង្កត់ ឬជាន់គ្នា​ស្លាប់ ។

ដោយឡែក ទីភ្នាក់ងារប៉ូលិសជាតិកូរ៉េខាងត្បូងបាននិយាយថា មេរបស់ពួកកេគឺលោកស្នងការ Yoon Hee-keun ក៏ត្រូវបានជូនដំណឹងជាលើកដំបូងចំពោះឧបទ្ទវហេតុនេះ ដោយនាយកដ្ឋានផ្នែកសង្គ្រោះបន្ទាន់នៅក្នុងសារជាអក្សរផងដែរ ពោលជាង ១ ម៉ោង បន្ទាប់ពីភាពចលាចលបានផ្ទុះឡើង ។

ទីភ្នាក់ងារនេះបានបន្ថែមថា អ្វីដែលធ្វើឲ្យមនុស្សស្លាប់ច្រើនបែបនេះនោះ គឺដោយសារតែវាត្រូវចំណាយពេល ៤០ នាទីឯណោះ ទើបឈានដល់ដំណាក់កាលដែលនាយកដ្ឋានផ្នែកសង្គ្រោះបន្ទាន់ ធ្វើការហៅទូរស័ព្ទជាលើកដំបូងទៅកាន់លោក Yoon មានន័យថា វាហួសពេលទៅហើយ ។

គួររំឭកថា មនុស្សប្រហែល ១០ ម៉ឺននាក់បានទៅលេងតំបន់ Itaewon ដែលជាសង្កាត់ដ៏ពេញនិយមបំផុតមួយក្នុងទីក្រុងសេអ៊ូល ដើម្បីប្រារព្ធពិធីបុណ្យ Halloween ពោលជាលើកដំបូងនៅក្នុងរយៈពេល ៣ ឆ្នាំ បន្ទាប់ពីប្រទេសកូរ៉េខាងត្បូងបានដកការរឹតត្បិតពាក់ព័ន្ធជំងឺកូវីដ ១៩ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ NHK