ព័ត៌មានអន្ដរជាតិ

ក្រៅពីអរគុណ កម្ពុជា, រដ្ឋមន្ត្រីការបរទេស អ៊ុយក្រែន ផ្ដោតលើបញ្ហា ២ ទៀតជាមួយសម្ដេចតេជោ ហ៊ុន សែន

បានផុស

២ years មុន

នៅ

ថ្ងៃពុធ ៩ វិច្ឆិកា ២០២២

ដោយ

លោក Dmytro Kuleba រដ្ឋមន្ត្រីការបរទេសអ៊ុយក្រែនបានបង្ហោះសារបន្ថែមនៅលើបណ្ដាញ Twitter របស់លោក ផ្ដោតលើបញ្ហាចំនួន ២ ទៀត ក្រោយជំនួបជាមួយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅវិមានសន្តិភាពនៅព្រឹកថ្ងៃទី៩ ខែវិច្ឆិកាឆ្នាំ២០២២ នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Kuleba បានសរសេរបង្ហោះលើបណ្ដាញ Twitter នៅថ្ងៃពុធនេះថា “ខ្ញុំបានចាប់ផ្ដើមដំណើរទស្សនកិច្ចរបស់ខ្ញុំមកកាន់កម្ពុជា ដោយមានការទទួលស្វាគមន៍ពីសម្ដេចតេជានាយករដ្ឋមន្ត្រី ហ៊ុន សែន ដើម្បីបន្តកិច្ចសន្ទនាជាមួយលោកប្រធានាធិបតី Volodymyr Zelensky ។ ទន្ទឹមនោះយើងក៏បានផ្ដោតលើកិច្ចសហប្រតិបត្តិការទ្វេភាគី និងសន្តិសុខស្បៀងអាហារពិភពលោកផងដែរ” ។

ស្របពេលជាមួយគ្នានេះលោក Kuleba ក៏បានអរគុណកម្ពុជាផងដែរ ដែលបានគាំទ្រតាមរយៈការចេញសេចក្ដីថ្លែងការណ៍រដ្ឋមន្ត្រីការបរទេសអាស៊ានបង្ហាញអំពីកង្វល់ចំពោះស្ថានការដែលកំពុងកើតឡើងនៅប្រទេសអ៊ុយក្រែន និងទាមទារឲ្យរុស្ស៊ីបញ្ឈប់ការប្រើប្រាស់កម្លាំងប្រដាប់អាវុធជាបន្ទាន់មក ហើយងាករកការចរចារវិញដើម្បីបញ្ឈប់សង្គ្រាម ។

បន្ថែមពីនេះ លោក Kuleba ក៏បានអបអរសារទរចំពោះខួបឯករាជ្យលើកទី ៦៩ របស់កម្ពុជា និងអបអរដែលកម្ពុជាទទួលបាននូវសុខសន្តិភាព និងការអភិវឌ្ឍ ក្រោយពីឆ្លងកាត់សង្គ្រាមអស់រយៈពេលជាច្រើនទស្សវត្សរ៍ ៕