មកស្គាល់មេដឹកនាំមួយរូបចូលរួមកិច្ចប្រជុំកំពូល អាស៊ាន លើកដំបូងនៅ កម្ពុជា ចាប់តាំងពីឡើងកាន់តំណែង

កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធដែលកម្ពុជាធ្វើជាម្ចាស់ផ្ទះឆ្នាំ ២០២២ នេះ គឺជាកិច្ចប្រជុំកំពូលថ្នាក់តំបន់លើកដំបូងរបស់លោកប្រធានាធិបតីហ្វីលីពីន Ferdinand Marcos Jr. ហើយលោកក៏ជាមេដឹកនាំថ្មីតែមួយគត់ផងដែរក្នុងចំណោមមេដឹកនាំអាស៊ានទាំងអស់នៅក្នុងកិច្ចប្រជុំមួយនេះ ចាប់តាំងការឡើងកាន់តំណែង ។

លោកប្រធានាធិបតី Ferdinand Marcos Jr. បានធ្វើដំណើរចេញពីទីក្រុងម៉ានីល កាលពីថ្ងៃទី៩ ខែវិច្ឆិកា មកកាន់រាជធានីភ្នំពេញ ដើម្បីចូលរួមក្នុងកិច្ចប្រជុំកំពូលអាស៊ាន ក្នុងនាមជាប្រមុខរដ្ឋ ចាប់ពីថ្ងៃទី ១០ ដល់ថ្ងៃទី ១៣ ខែវិច្ឆិកា ។

ទន្ទឹមនោះ កិច្ចប្រជុំកំពូលលើកទី ៤០ និង ៤១ នៅរាជធានីភ្នំពេញ ក៏នឹងក្លាយជាកិច្ចជួបជុំដោយផ្ទាល់លើកដំបូងរបស់មេដឹកនាំអាស៊ាន និងដៃគូសន្ទនារបស់អាស៊ាន ក្នុងអំឡុងពេលជំងឺរាតត្បាតកូវីដ ១៩ ។

គួរបញ្ជាក់ថា លោក Ferdinand Marcos Jr. ដែលជាកូនប្រុសរបស់អតីតមេដឹកនាំហ្វីលីពីនលោក Ferdinand Marcos បានជាប់ឆ្នោតយ៉ាងភ្លូកទឹកភ្លូកដីកាលពីខែឧសភា និងបានចូលស្បថចូលកាន់តំណែងជាប្រធានាធិបតីកាលពីថ្ងៃទី៣០ ខែមិថុនា ឆ្នាំ ២០២២ នេះ ៕

ដោយ ៖ ជីវ័ន្ត

ចុចអាន ៖ ក្រៅពី កម្ពុជា ប្រទេសអាស៊ាន ២ ទៀតក៏នឹងធ្វើជាម្ចាស់ផ្ទះកិច្ចប្រជុំកំពូល​អន្តរជាតិធំៗឆ្នាំនេះ