ក្រុមហ៊ុនអាកាសចរណ៍ពីរព្រមព្រៀងគ្នាជួយដឹកជញ្ជូនវ៉ាក់សាំងកូវីដ

ក្រុមហ៊ុនបាននិយាយកាលពីថ្ងៃចន្ទ ទី៤ ខែមករា ថា ក្រុមហ៊ុនអាកាសចរណ៍ Dubai International Airports របស់ប្រទេសអារ៉ាប់រួមនិងប្រតិបត្តិករព្រលានយន្តហោះរបស់ក្រុមហ៊ុនអាកាសចរណ៍ GMR Hyderabad របស់ឥណ្ឌាបានយល់ព្រមលើកិច្ចព្រមព្រៀងដឹកជញ្ជូនសម្រាប់ការចែកចាយវ៉ាក់សាំងកូវីដ ១៩ រហូតដល់ ៣០០ តោនក្នុងមួយថ្ងៃ ។

ច្រកផ្លូវវ៉ាក់សាំងរវាងទីក្រុង Dubai និងទីក្រុង Hyderabad ភ្ជាប់ក្រុមហ៊ុនផលិតវ៉ាក់សាំងឈានមុខគេនៅក្នុងប្រទេសឥណ្ឌាជាមួយនឹងទីផ្សារជុំវិញពិភពលោកតាមរយៈមជ្ឈមណ្ឌលដឹកទំនិញនៃក្រុមហ៊ុនអាកាសចរណ៍ Dubai International Airport ។

លោក Paul Griffiths នាយកប្រតិបត្តិនៃក្រុមហ៊ុនអាកាសចរណ៍ Dubai International Airports បាននិយាយថា “ការកើនឡើងនូវតម្រូវការដ៏មានប្រសិទ្ធិភាព សុវត្ថិភាព និងអាចទុកចិត្តបានក្នុងការចែកចាយវ៉ាក់សាំងការពារជំងឺកូវីដ ១៩ ដែលមានបរិមាណច្រើនត្រូវបានគេរំពឹងទុកនៅប៉ុន្មានខែខាងមុខនេះ ។ យើងចង់ត្រៀមខ្លួនដើម្បីឆ្លើយតប និងបំពេញតម្រូវការនោះ” ។

Hyderabad គឺជារដ្ឋធានីវ៉ាក់សាំងដែលកំពុងមានរីកចម្រើននៅលើពិភពលោក ហើយមានក្រុមហ៊ុនផលិតវ៉ាក់សាំងធំៗចំនួន ៥ នៅក្បែរនោះ ។

ប្រទេសឥណ្ឌាដែលមានចំនួននៃការឆ្លងជំងឺកូវីដ ១៩ ខ្ពស់លំដាប់ទី ២ នៅលើពិភពលោកកាលពីថ្ងៃអាទិត្យបានអនុម័តវ៉ាក់សាំងកូវីដចំនួនពីរសម្រាប់ការប្រើប្រាស់ជាបន្ទាន់ មួយត្រូវបានបង្កើតឡើងដោយក្រុមហ៊ុន AstraZeneca និងសាកលវិទ្យាល័យ Oxford និងមួយទៀតដោយក្រុមហ៊ុនក្នុងស្រុក Bharat Biotech ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ក្រោយមានអ្នកឆ្លងកូវីដច្រើនឡើងៗ នាយករដ្ឋមន្រ្តីថៃជំរុញឲ្យប្រជាជនកុំចេញទៅណា

ចុចអាន ៖ រុស្ស៊ី ត្រៀមបង្ហាញសមត្ថភាពមីស៊ីលផ្លោងអន្តរទ្វីបថ្មីដែលអាចកម្ទេចប្រទេសបារាំងទាំងមូល