វីដេអូថតជាប់ស្តែងៗ ការវាយប្រហារភេរវកម្មនៅតួកគី ស្លាប់និងរបួសមនុស្សជិត ១០០នាក់ 

អាជ្ញាធរតួកគីបាននិយាយថា មនុស្សចំនួន៦នាក់បានស្លាប់ និង៨១នាក់រងរបួស ក្នុងការផ្ទុះមួយនៅតំបន់ដ៏មមាញឹក កណ្តាលទីក្រុងអ៊ីស្តង់ប៊ុល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលក្រុង លោក Ali Yerlikaya និយាយថា ការបំផ្ទុះបានកើតឡើងនៅម៉ោងប្រហែល ១៦ និង២០នាទី (ម៉ោងក្នុងស្រុក) លើផ្លូវពោរពេញទៅដោយអ្នកដើរទិញឥវ៉ាន់ក្នុងទីលាន Taksim។

លោកអនុប្រធានាធិបតី Fuat Oktay និយាយថា ការបំផ្ទុះនេះ ត្រូវបានគេគិតថាជាការវាយប្រហារភេរវកម្មដែលបង្កឡើងដោយស្ត្រីម្នាក់។

ស្របពេលជាមួយគ្នានោះ លោកប្រធានាធិបតី Recep Tayyip Erdogan បាននិយាយថា ជនល្មើសនឹងត្រូវទទួលទោស។ 

ថ្លែងក្នុងសន្និសីទសារព័ត៌មាននៅទីក្រុងអ៊ីស្តង់ប៊ុល លោកបានថ្កោលទោសនូវអ្វីដែលលោកហៅថាជាការវាយប្រហារដ៏ឃោរឃៅ។

ដោយឡែក រដ្ឋមន្ត្រីក្រសួងយុត្តិធម៌ Bekir Bozdag បានប្រាប់ប្រព័ន្ធផ្សព្វផ្សាយតួកគីថា ស្ត្រីម្នាក់បានអង្គុយនៅលើកៅអីអស់រយៈពេលជាង៤០នាទី ហើយចាកចេញនៅប៉ុន្មាននាទីមុនពេលការផ្ទុះកើតឡើង។

រហូត​មក​ដល់​ពេល​នេះ ​មិន​មាន​នរណា​ម្នាក់​ចេញ​មុខ​អះអាង​ទទួល​ខុស​ត្រូវ​ចំពោះ​ការ​បំផ្ទុះ​នេះ​ទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ការវាយប្រហារ​ភេរវកម្ម​នៅអ៊ីរ៉ង់ សម្លាប់​មនុស្ស​ ១៥​នាក់​