មីយ៉ាន់ម៉ា ថ្កោលទោសផែនការ អាស៊ាន មានចំណែកចូលរួមជាមួយភាគី​ប្រឆាំង

យោធាមីយ៉ាន់ម៉ាបានថ្កោលទោសចំពោះការសម្រេចចិត្តរបស់អាស៊ាន ហើយបានចាត់ទុកអាស៊ានចូលរួមជាមួយនឹងពួកប្រឆាំង ដើម្បីស្វែងរកវិធីបញ្ចប់វិបត្តិបង្ហូរឈាមរបស់ប្រទេសមីយ៉ាន់ម៉ា ។

តាមរយៈ​សេចក្តី​ថ្លែងការណ៍​មួយរបស់ក្រសួង​ការ​បរទេស​មីយ៉ាន់ម៉ា​បាន​និយាយថា “មីយ៉ាន់ម៉ាប្រឆាំង និងថ្កោលទោសចំពោះការព្យាយាមរបស់ប្រទេសសមាជិកអាស៊ាន ក្នុងការចូលរួមជាមួយអង្គការភេរវករ និងខុសច្បាប់ទាំងនោះ ទោះតាមមធ្យោបាយ ឬទម្រង់ណាមួយក៏ដោយ” ។

វិបត្តិ​មីយ៉ាន់ម៉ា​ គឺជា​ប្រធានបទ​ដ៏សំខាន់​ក្នុង​កិច្ចប្រជុំ​កំពូល​មេដឹកនាំ​អាស៊ាន​នៅទីក្រុង​ភ្នំពេញ ស្របពេលដែលមីយ៉ាន់ម៉ាមិនបានចូលរួម ដោយសារតែបរាជ័យក្នុងការបើកការចរចាជាមួយគូប្រជែង ចាប់តាំងពីធ្វើរដ្ឋប្រហារកាន់កាប់អំណាចកាលពីឆ្នាំមុន ។

នៅក្នុងសេចក្តីថ្លែងការណ៍ ១៥ ចំណុចដែលកើតចេញពីកិច្ចសន្ទនារវាងរដ្ឋមន្ត្រីការបរទេសអាស៊ានរយៈពេល ២ ថ្ងៃ អាស៊ានបានយល់ព្រមក្នុងការចូលរួមជាមួយគ្រប់ភាគីពាក់ព័ន្ធទាំងអស់ក្នុងពេលឆាប់ៗនេះ ។ នេះទំនងជាពាក់ព័ន្ធនឹងការជួបពិភាក្សាជាមួយតំណាងរដ្ឋាភិបាលបង្រួបបង្រួមជាតិ (NUG) ជាគូភាគីដែលបង្កើតឡើងដោយអតីតសមាជិកសភាមកពីគណបក្ស NLD របស់លោកស្រី អ៊ុងសាន ស៊ូជី ។

រដ្ឋាភិបាលបង្រួបបង្រួមជាតិ (NUG) បានចាត់ទុកខ្លួនឯងថា ជារដ្ឋាភិបាលស្របច្បាប់របស់ប្រទេស ប៉ុន្តែយោធាមីយ៉ាន់ម៉ាចាត់ទុកថា ក្រុមនេះជាភេរវករ ហើយយោធាថែមទាំងបានថ្កោលទោសចំពោះការផាត់ចោលពួកគេចេញពីកិច្ចប្រជុំអាស៊ានផងដែរថា ជាកិច្ចប្រជុំដោយឯកតោភាគី និងព្យាបាទ ៕

ប្រែសម្រួលដោយ ៖ គង់ សំអាន

ប្រភព ៖ MGR Online

ចុចអាន ៖ ក្រៅពីជាព្រះមហាក្សត្រ ព្រះចៅស៊ុលតង់ ព្រុយណេ ទ្រង់កាន់តំណែងធំៗ ៤ ផ្សេងទៀត