តួកគី មិនទទួលយកសាររំលែកទុក្ខរបស់ អាមេរិក ចំពោះការបំផ្ទុះគ្រាប់បែក នៅទីក្រុងអ៊ីស្តង់ប៊ុល

ប្រទេសតួកគីកាលពីថ្ងៃចន្ទបានច្រានចោល និងមិនទទួលយកការចូលរួមរំលែកទុក្ខរបស់សហរដ្ឋអាមេរិកនោះទេ ពាក់ព័ន្ធហេតុការណ៍វាយប្រហារដោយគ្រាប់បែកនៅទីក្រុងអ៊ីស្ដង់ប៊ុល ដែលបានសម្លាប់មនុស្សចំនួន ៦ នាក់ ខណៈទីក្រុងអង់ការ៉ាបានស្ដីបន្ទោសទៅលើក្រុមសកម្មប្រយុទ្ធឃឺដ ។

រដ្ឋមន្ត្រីក្រសួងមហាផ្ទៃលោក Suleyman Soylu បាននិយាយនៅក្នុងការអត្ថាធិប្បាយតាមទូរទស្សន៍ថា “យើង​សូមបដិសេដ និងមិន​ទទួល​យក​សារ​រំលែក​ទុក្ខ​របស់​ស្ថានទូត​អាមេរិកនោះ​ទេ” ។

ទន្ទឹមនឹងនេះ មន្ត្រីតួកគីបាននិយាយផងដែរថា ទីក្រុងអង់ការ៉ាកំពុងធ្វើការជាមួយប្រទេសមួយចំនួនប្រឆាំងនឹងអំពើភេរវកម្ម រួមទាំងការបំផ្ទុះគ្រាប់បែកនៅទីក្រុងអ៊ីស្តង់ប៊ុលកាលពីថ្ងៃអាទិត្យផងដែរ ហើយបានស្ដីបន្ទោសអំពើដ៏ឃោរឃៅនេះ ទៅលើក្រុមសកម្មប្រយុទ្ធឃឺដ ដោយសារតែក្រុមនេះបានធ្វើប្រតិបត្តិការជាច្រើននៅភាគខាងជើងប្រទេសស៊ីរី ។

កន្លងមកលោកប្រធានាធិបតីតួកគី Recep Tayyip Erdogan តែងតែចោទប្រកាន់ទីក្រុងវ៉ាស៊ីនតោន ពីការផ្គត់ផ្គង់អាវុធដល់សកម្មប្រយុទ្ធឃឺដ នៅភាគខាងជើងប្រទេសស៊ីរី ដែលទីក្រុងអង់ការ៉ាចាត់ទុកថាជា “ពួកភេរវករ” ៕

ប្រែសម្រួលដោយ ៖ ជីវ័ន្ត

ប្រភព ៖ Arab News

ចុចអាន ៖ តួកគី ចាប់ខ្លួនមនុស្ស២២នាក់ ពាក់ព័ន្ធការបំផ្ទុះគ្រាប់បែក