នារីបម្រើការតាមយន្តហោះហ្វីលីពីនត្រូវមិត្តភ័ក្ដិជិត ១០ នាក់រំលោភបូករហូតដល់ស្លាប់

ប៉ូលិសបាននិយាយថា អ្នកបម្រើការតាមយន្តហោះម្នាក់ត្រូវបានគេប្រទះឃើញស្លាប់នៅក្នុងអាងងូតទឹកនៃសណ្ឋាគារមួយនៅប្រទេសហ្វីលីពីន ខណៈប៉ូលិសសង្ស័យថា នាងប្រហែលជាត្រូវបានគេរំលោភបូក ។

មុនកើតហេតុ Christine Angelica Dacera អាយុ ២៣ ឆ្នាំត្រូវបានគេឃើញចូលរួមក្នុងកម្មវិធីមួយដើម្បីអបអរឆ្នាំថ្មីជាមួយមិត្តភ័ក្តិរបស់នាងប្រហែល ១០ នាក់នៅសណ្ឋាគារលំដាប់ផ្កាយបួន City Garden Hotel នៅទីក្រុងម៉ានីល ។ បន្ទាប់ពីនោះមិត្តភ័ក្ដិរបស់នាងបានឃើញនាងសន្លប់នៅក្នុងអាងទឹករួចក៏ប្រញាប់ប្រញាលបញ្ជូនទៅមន្ទីរពេទ្យក្នុងតំបន់ Makati ។

ក្រោយមកលោកវរសេនីយ៍ទោ Harold Depositar បានប្រាប់ប្រព័ន្ធផ្សព្វផ្សាយក្នុងស្រុក Pilipino Star Ngayon ថា មន្ទីរពេទ្យបានជូនដំណឹងដល់អាជ្ញាធរអំពីការស្លាប់របស់នាងនៅម៉ោង ៥ ល្ងាចថ្ងៃទី ១ ខែមករា ។

ទន្ទឹមនោះក្រុមអ្នកស៊ើបអង្កេតកំពុងរង់ចាំការធ្វើកោសល្យវិច័យ ប៉ុន្តែបានបញ្ជាក់ថា រាងកាយរបស់នារីវ័យក្មេងរូបនេះមានស្នាមជាំទាំងភ្លៅ និងជង្គង់ ។

ប៉ូលិសក៏កំពុងរង់ចាំរបាយការណ៍នៃការពុលណាមួយផងដែរដើម្បីដឹងថាតើនាងបានប្រើប្រាស់គ្រឿងញៀន ឬគ្រឿងស្រវឹង ខណៈករណីនេះក៏ត្រូវបានគេកំណត់ពីមូលហេតុបន្ទាប់បន្សំពាក់ព័ន្ធនឹងជំងឺដាច់សរសៃឈាមផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Sun

ចុចអាន ៖ ការបាត់ខ្លួនរបស់ Jack Ma កំពុងបង្កឲ្យមានការជជែកវែកញែកយ៉ាងក្តៅគគុក

ចុចអាន ៖ ក្រុមហ៊ុនអាកាសចរណ៍ពីរព្រមព្រៀងគ្នាជួយដឹកជញ្ជូនវ៉ាក់សាំងកូវីដ