លោក បៃដិន ជំពប់ជើង ពេលឡើងជណ្ដើរក្នុងកិច្ចប្រជុំ G20 នៅកោះបាលី

ប្រធានាធិបតីសហរដ្ឋអាមេរិកលោក ចូ បៃដិន បានជំពប់ជើង ខណៈកំពុងឡើងជណ្ដើរចូលរួមក្នុងកិច្ចប្រជុំកំពូល G20 នៅកោះបាលី ប៉ុន្តែត្រូវបានទប់ជាប់ដោយប្រធានាធិបតីឥណ្ឌូណេស៊ីលោក Joko Widodo ។

ទោះយ៉ាងណា នេះមិនមែនជាលើកទីមួយទេ ដែលប្រធានាធិបតីវ័យជិត ៨០ ឆ្នាំរូបនេះជំពប់ជើង ពេលដើរឡើងជណ្ដើរនោះ ពោលកាលពីខែមីនា ឆ្នាំ២០២១ លោក បៃដិន ក៏បានជំពប់ជើងដួល ៣ ដងផងដែរ នៅពេលដែលលោកឡើងជណ្ដើរយន្តហោះ Air Force One នៅឯមូលដ្ឋាន Joint Base Andrews ក្នុងរដ្ឋ Maryland មុនពេលធ្វើដំណើរទៅកាន់ទីក្រុង Atlanta ។

ទន្ទឹមនោះ ហេតុការណ៍ស្រដៀងគ្នានេះបានកើតឡើងម្ដងទៀតលើលោក បៃដិន ។ កាលពីខែមិថុនា ឆ្នាំ ២០២២ នេះ លោក បៃដិន បានជំពប់ជើងដដែល ខណៈកំពុងឡើងជណ្ដើរយន្តហោះ Air Force One ធ្វើដំណើរទៅកាន់ទីក្រុង Los Angeles ដើម្បីចូលរួមកិច្ចប្រជុំកំពូលអាមេរិក ។

គួរបញ្ចាក់ថា លោក ចូ បៃដិន បានធ្វើដំណើរទៅកាន់ប្រទេសឥណ្ឌូណេស៊ីកាលពីថ្ងៃទី១៣ ខែវិច្ឆិកា ឆ្នាំ២០២២ នេះដើម្បីចូលរួមកិច្ចប្រជុំកំពូល G20 ដែលរៀបចំឡើងកាលពីថ្ងៃទី១៥ ដល់ថ្ងៃទី១៦ ខែវិច្ឆិកា នៅកោះបាលី ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក បៃដិន ថា មីស៊ីល ដែលវាយប្រហារប៉ូឡូញ មិនទំនងជាបាញ់ចេញពី រុស្ស៊ី ទេ