អាមេរិក សរសើរ រុស្ស៊ី (មានវីដេអូ)

កាលពីថ្ងៃអាទិត្យទី២០ខែវិច្ឆិកា រដ្ឋមន្ត្រីការពារជាតិអាមេរិក លោក Lloyd Austin បានសរសើរកងកម្លាំងប្រដាប់អាវុធ និងសព្វាវុធរបស់រុស្ស៊ី ប៉ុន្តែអះអាងថា ថ្វីបើដូច្នេះក្តី យោធាបែបនេះ ប្រហែលជាមិនអាចអនុញ្ញាតឲ្យទីក្រុងមូស្គូ ទទួលបានជ័យជម្នះក្នុងជម្លោះអ៊ុយក្រែននោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Austin បាននិយាយក្នុងវេទិកាសន្តិសុខអន្តរជាតិ Halifax នៅប្រទេសកាណាដាថា “អ្នកដឹងទេ រុស្ស៊ីមានយោធាដ៏ធំ និងសព្វាវុធយ៉ាងសម្បើម ប៉ុន្តែនេះមិនបានជួយឲ្យពួកគេឈ្នះនៅក្នុងយុទ្ធនាការដ៏ឃោរឃៅបាននោះទេ”។

ស្របពេលជាមួយគ្នានោះ រដ្ឋមន្ត្រីការពារជាតិរូបនេះ បានសរសើរប្រធានាធិបតីសហរដ្ឋអាមេរិកលោក Joe Biden សម្រាប់ការប្រមូលផ្តុំប្រជាជាតិនៃសុច្ឆន្ទៈ ប្រឆាំងនឹងការប៉ុនប៉ងរបស់រុស្ស៊ី ក្នុងការប្រើកម្លាំងដើម្បីគូសព្រំដែនឡើងវិញ។

លោក Austin ក៏បាននិយាយផងដែរថា សហរដ្ឋអាមេរិកនឹងឈរនៅខាងអ៊ុយក្រែន ដរាបណាជម្លោះនៅតែបន្ត។

ទោះជាយ៉ាងណាក៏ដោយ លោកបានបន្ថែមថា អង្គការណាតូ នឹងមិនត្រូវបានអូសទាញឲ្យចូលទៅក្នុងអ្វីដែលលោកពណ៌នាថាជា “វិបត្តិសន្តិសុខអឺរ៉ុបដ៏អាក្រក់បំផុត ចាប់តាំងពីចុងបញ្ចប់នៃសង្គ្រាមលោកលើកទីពីរនោះទេ ដរាបណាទីក្រុងមូស្គូ មិនវាយប្រហាររដ្ឋសមាជិកណាមួយរបស់ខ្លួន”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ អង់គ្លេសព្រមានថា សព្វាវុធ ដែល បញ្ជូន ទៅ អ៊ុយក្រែន អាចធ្លាក់ដល់ដៃក្រុមភេរវករ