មន្ទីរបញ្ចកោណ ចេញសេចក្តីថ្លែងការណ៍ ក្រោយជំនួបរវាងលោក Lloyd Austin និងរដ្ឋមន្ត្រីការពារជាតិចិន នៅ កម្ពុជា

នៅថ្ងៃអង្គារទី២២ខែវិច្ឆិកានេះ រដ្ឋមន្ត្រីក្រសួងការពារជាតិអាមេរិក លោក Lloyd J. Austin III បានជួបជាមួយនាយឧត្តមសេនីយ៍ Wei Fenghe រដ្ឋមន្ត្រីក្រសួងការពារជាតិនៃសាធារណរដ្ឋប្រជាមានិតចិន ក្នុងកិច្ចប្រជុំរដ្ឋមន្ត្រីការពារជាតិអាស៊ាន-បូក នៅខេត្តសៀមរាប ប្រទេសកម្ពុជា។

ក្នុងសេចក្តីថ្លែងការណ៍ដែលចេញដោយមន្ទីរបញ្ចកោណ, លោក Austin និងលោក Wei បានពិភាក្សាគ្នាអំពីទំនាក់ទំនងការពារជាតិអាមេរិក-ចិន និងបញ្ហាសន្តិសុខក្នុងតំបន់ ព្រមទាំងពិភពលោក។ លោក Austin បានសង្កត់ធ្ងន់លើភាពចាំបាច់ក្នុងការគ្រប់គ្រងការប្រកួតប្រជែង ប្រកបដោយភាពទំនួលខុសត្រូវ និងរក្សាទំនាក់ទំនងឲ្យបើកចំហ។

លោក Austin ក៏បានពិភាក្សាផងដែរ អំពីសារសំខាន់នៃកិច្ចសន្ទនា ស្តីពីការកាត់បន្ថយហានិភ័យជាយុទ្ធសាស្រ្ត ការកែលម្អទំនាក់ទំនងដែលមានវិបត្តិ និងការលើកកម្ពស់សុវត្ថិភាពប្រតិបត្តិការ។

ស្របពេលជាមួយគ្នានោះ លោក​បាន​លើក​ឡើង​ពី​ក្តី​ព្រួយ​បារម្ភ ​អំពី​អាកប្បកិរិយាដ៏​គ្រោះថ្នាក់​ដែល​បង្ហាញ​ដោយ​យន្តហោះរបស់កងទ័ពរំដោះប្រជាជន នៅ​ក្នុង​តំបន់​ឥណ្ឌូ​ប៉ាស៊ីហ្វិក ដែល​បង្កើន​ហានិភ័យ​នៃ​គ្រោះថ្នាក់។ លោករដ្ឋមន្ត្រីក៏បានបញ្ជាក់ផងដែរថា សហរដ្ឋអាមេរិកនឹងបន្តហោះហើរ ធ្វើនាវាចរណ៍ និងប្រតិបត្តិការគ្រប់ទីកន្លែងដែលច្បាប់អន្តរជាតិអនុញ្ញាត។

លើសពីនេះ លោក Austin បានពិភាក្សាអំពីសង្គ្រាមរបស់រុស្ស៊ីប្រឆាំងនឹងអ៊ុយក្រែន ហើយបានគូសបញ្ជាក់ពីរបៀបដែលទាំងសហរដ្ឋអាមេរិក និងចិន ប្រឆាំងនឹងការប្រើប្រាស់អាវុធនុយក្លេអ៊ែរ ឬការគំរាមកំហែងក្នុងការប្រើប្រាស់នុយក្លេអ៊ែរ។

លោក Austin ក៏បានសម្តែងក្តីព្រួយបារម្ភផងដែរ អំពីការបង្កហេតុនាពេលថ្មីៗនេះពីសំណាក់ប្រទេសកូរ៉េខាងជើង និងបានអំពាវនាវឲ្យចិន អនុវត្តយ៉ាងពេញលេញនូវសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលមានស្រាប់ ទាក់ទងនឹងកម្មវិធីអាវុធខុសច្បាប់របស់កូរ៉េខាងជើង។

រដ្ឋមន្ត្រីការពារជាតិអាមេរិក បានរំលឹកឡើងវិញថា ទីក្រុងវ៉ាស៊ីនតោន នៅតែប្តេជ្ញាចិត្តចំពោះគោលនយោបាយចិនតែមួយដ៏យូរអង្វែង ដែលត្រូវបានដឹកនាំដោយច្បាប់ទំនាក់ទំនងតៃវ៉ាន់, សេចក្តីថ្លែងការណ៍រួមបីសហរដ្ឋអាមេរិក-ចិន និងការធានាគោលការណ៍៦ចំណុច៕

ប្រែសម្រួល៖ Vann Vann

ប្រភព៖ ក្រសួងការពារជាតិអាមេរិក

ចុចអាន៖ អាមេរិក ឲ្យ ចិន ឈប់បង្កអស្ថិរភាពបន្ថែមទៀតលើ តៃវ៉ាន់