កូរ៉េខាងជើង អួតថា ការបាញ់មីស៊ីលផ្លោងអន្តរទ្វីបលើកចុងក្រោយ គឺជា ជោគជ័យដ៏ល្អគ្មានពីរ

កាសែត Rodong Sinmun បាននិយាយថា ប្រទេសកូរ៉េខាងជើងទទួលបានភាពជោគជ័យដ៏ល្អគ្មានពីរ នៅក្នុងការបាញ់សាកល្បងលើកចុងក្រោយរបស់ខ្លួននៃមីស៊ីលផ្លោងអន្តរទ្វីប Hwasong-17 កាលពីថ្ងៃទី១៨ ខែវិច្ឆិកាកន្លងមក ។

នៅក្នុងលិខិតមួយផ្ញើទៅកាន់មេដឹកនាំលោក គីម ជុងអ៊ុន ពីសមាជិកសាលាវិទ្យាសាស្ត្រការពារជាតិ ដែលបានចូលរួមក្នុងការអភិវឌ្ឍមីស៊ីល ICBM បានឲ្យដឹងថា ពួកគេសូមសម្ដែងការដឹងគុណចំពោះលោក គីម ហើយបានហៅការបាញ់សាកល្បងនេះថាជា ជោគជ័យដ៏ល្អឥតខ្ចោះ និងល្អគ្មានពីរ ។

លិខិតនេះក៏បង្ហាញផងដែរថា លោក គីម បានលើកឡើងពីការរៀបចំជើងទម្របាញ់មីស៊ីលពីក្រោមដី ដែលនឹងធ្វើឲ្យសត្រូវពិបាកក្នុងការរកឃើញការបាញ់បង្ហោះមីស៊ីល Hwasong-17 និងស្ទាក់ចាប់វាផងដែរ ខណៈមីស៊ីលផ្លោងប្រភេទនេះ ត្រូវបានគេរាយការណ៍ថា អាចហោះទៅដល់ដីគោករបស់សហរដ្ឋអាមេរិក ។

ពាក់ព័ន្ធនឹងភាពជោគជ័យនេះដែរ លោក គីម ក៏បានណែនាំអ្នកវិទ្យាសាស្ត្រឲ្យប្រកាសបញ្ចប់ការអភិវឌ្ឍមីស៊ីលផ្លោងអន្តរទ្វីប ICBM នៅចុងឆ្នាំនេះ ស្របពេលដែលប្រទេសនេះ ក៏ទើបតែផលិតបានកង់ចល័តថ្មីសម្រាប់បំពាក់ជើងទម្របាញ់មីស៊ីល ICBM ចំនួន ២២ ហើយទទួលបានងារជា “វីរៈបុរសកូរ៉េខាងជើង” ។

ជាចុងក្រោយកាសែត​ Rodong Sinmun ក៏​បាន​រាយការណ៍​ដែរ​ថា បច្ចុប្បន្នកម្លាំងនុយក្លេអ៊ែររបស់កូរ៉េខាងជើង ត្រូវបានពង្រឹង និងពង្រីកក្នុងល្បឿនដ៏លឿនយ៉ាងពិសេស ដោយសារតែមានការចូលរួមពីមនុស្សជាង ១០០ នាក់សម្រាប់ការអភិវឌ្ឍមីស៊ីលនេះ ក្នុងនោះមានទាំងប្រធានសាលាវិទ្យាសាស្ត្រការពារគឺលោកឧត្តមសេនីយ៍ Jang Chang Ha ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ គីម ជុងអ៊ុន បង្ហាញមុខកូនស្រីម្តងទៀត ជាមួយការប្តេជ្ញា បង្កើតកម្លាំងនុយក្លេអ៊ែរមានឥទ្ធិពលបំផុតលើ ពិភពលោក