ស្ងាត់ដំណឹងយូរ ដឹងទេ មហាសេដ្ឋី Jack Ma សំងំរស់នៅប្រទេសណា?

កាសែត Financial Times បានរាយការណ៍នៅថ្ងៃពុធ ទី៣០ ខែវិច្ឆិកានេះថា ស្ថាបនិកក្រុមហ៊ុន Alibaba លោក Jack Ma បានរស់នៅក្នុងទីក្រុងតូក្យូអស់រយៈពេលជិត ៦ ខែហើយ បន្ទាប់ពីការបង្ក្រាបរបស់រដ្ឋាភិបាលចិនលើវិស័យបច្ចេកវិទ្យា ។

ដោយដកស្រង់ចេញពីប្រភពជិតស្និទ, កាសែត Financial Times បាន​រាយការណ៍​ទៀតថា មហាសេដ្ឋីរូបនេះបានចំណាយពេលជិត ៦ ខែស្នាក់នៅជាមួយគ្រួសាររបស់លោកនៅទីក្រុងតូក្យូ និងផ្នែកផ្សេងទៀតនៃប្រទេសជប៉ុន រួមទាំងការធ្វើដំណើរជាទៀងទាត់ទៅកាន់សហរដ្ឋអាមេរិក និងអ៊ីស្រាអែលផងដែរ ។

កាសែតអង់គ្លេសបានចុះផ្សាយបន្ថែមថា លោក Jack Ma ឧស្សាហ៍ទៅលេងក្លឹបដើម្បីជួបជុំសមាជិកឯកជនជាច្រើននៅទីក្រុងតូក្យូ ហើយក៏បានក្លាយជាអ្នកប្រមូលទិញរបស់របរសិល្បៈទំនើបៗថែមទៀតផង ។

កាលពីខែកក្កដាកន្លងទៅ របាយការណ៍មួយបាននិយាយថា លោក Ma គ្រោងនឹងប្រគល់ការគ្រប់គ្រងរបស់ក្រុមហ៊ុន Ant Group ដើម្បីផ្គាប់ចិត្តនិយតករចិន ស្របពេល Alibaba ដែលជាក្រុមហ៊ុនពាណិជ្ជកម្មអេឡិចត្រូនិកដ៏ធំរបស់លោក បានរាយការណ៍ពីកំណើនប្រាក់ចំណូលថេរនៅក្នុងខែសីហាជាលើកដំបូង ខណៈដែលប្រទេសចិនបានប្រយុទ្ធប្រឆាំងនឹងការធ្លាក់ចុះនៃសេដ្ឋកិច្ច និងករណីផ្ទុះជំងឺកូវីដ ១៩ ឡើងវិញ ។

បន្ថែមពីនេះ អាជ្ញាធរអាមេរិកបានដាក់ក្រុមហ៊ុនរបស់លោក Ma នៅក្នុងបញ្ជីតាមដានផងដែរ ដែលអាចមើលឃើញថា វាត្រូវបានលុបចោលនៅក្នុងទីក្រុងញូវយ៉កឬយ៉ាងណា ប្រសិនបើក្រុមហ៊ុននេះមិនគោរពតាមបទបញ្ជាបង្ហាញ ដែលបណ្តាលឲ្យភាគហ៊ុនរបស់ខ្លួនធ្លាក់ចុះ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ អតីតមេដឹកនាំចិន លោក Jiang Zemin ទទួលមរណភាព