ដឹងទេ ព្រៃអាម៉ាហ្សូន បាត់បង់ប៉ុន្មានគីឡូម៉ែត្រក្រឡា ក្នុងមួយឆ្នាំនេះ?

អាម៉ាហ្សូន ដែលជាព្រៃឈើធំជាងគេក្នុងពិភពលោក នៅតែបន្តការកាប់បំផ្លាញយ៉ាងសកម្មក្នុងប្រទេសប្រេស៊ីល ។ បើយោងតាមវិទ្យាស្ថានស្រាវជ្រាវរបស់ប្រេស៊ីលនិយាយថា ក្នុងរយៈពេលពេញមួយឆ្នាំ ព្រៃអាម៉ាហ្សូន​ត្រូវបានបាត់បង់ប្រហែល ១១,៦០០ គីឡូម៉ែត្រក្រឡា ។

ជាមួយគ្នានោះ កាលពីថ្ងៃពុធ វិទ្យាស្ថានជាតិស្រាវជ្រាវអវកាសប្រេស៊ីលនិយាយថា ព្រៃឈើប្រមាណ ១១,៥៦៨ គីឡូម៉ែត្រការ៉េ ត្រូវបានបំផ្លាញចាប់ពីខែសីហា ឆ្នាំ ២០២១ ដល់ខែកក្កដា ឆ្នាំ ២០២២ ដោយសារភ្លើងឆេះ និងការកាប់បំផ្លាញដោយខុសច្បាប់ ។

តួរលេខនេះផងដែរ ធ្លាក់ចុះប្រហែល ១១ ភាគរយធៀបនឹងឆ្នាំមុន ប៉ុន្តែនៅតែជាការខាតបង់ប្រចាំឆ្នាំជាង ១០,០០០ គីឡូម៉ែត្រការ៉េសម្រាប់ ៤ ឆ្នាំ​ជាប់ៗគ្នា ។

ចំពោះសកម្មភាព​​បំផ្លាញព្រៃឈើនេះ រដ្ឋាភិបាលលោកខាងលិច និងសកម្មជនបរិស្ថានជាច្រើន បានស្តីបន្ទោស ប្រធានាធិបតីប្រេស៊ីល លោក Jair Bolsonaro យ៉ាងខ្លាំង​ចំពោះការកាប់ព្រៃឈើ ដើម្បីការអភិវឌ្ឍន៍ ។

ដោយឡែក លោក Luiz Inacio Lula da Silva ដែលនឹងចូលកាន់តំណែងជាប្រធានាធិបតី នៅខែមករាខាងមុខ បានប្តេជ្ញា នឹងការពារព្រៃអាម៉ាហ្សូនឲ្យបានល្អ ។

បន្ថែមពីនេះ លោកក៏បានស្នើឲ្យមានការរៀបចំសន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិនៅឆ្នាំ ២០២៥ នៅព្រៃអាម៉ាហ្សូនផងដែរ ៕

ប្រែសម្រួលដោយ ៖ ណាក់ ណាក់

ប្រភព ៖ NHK

ចុចអាន ៖ អស់ពី Apple គំរាម! ពេលនេះ Twitter ក្លាយជាផ្ទាំងស៊ីបរបស់ EU ម្ដង