កងទ័ពរុស្ស៊ី និងបេឡារុស កំពុងហ្វឹកហាត់ដើម្បីប្រយុទ្ធរួមកម្លាំងគ្នាជាធ្លុងមួយ

កងទ័ពមកពីប្រទេសរុស្ស៊ី និងបេឡារុស កំពុងហ្វឹកហាត់ដើម្បីប្រយុទ្ធរួមកម្លាំងគ្នាជាធ្លុងមួយ។ នេះបើតាមការអះអាងពីប្រធានាធិបតីបេឡារុស លោក Alexander Lukashenko ចំពេលមានភាពតានតឹងកាន់តែខ្លាំងជាមួយលោកខាងលិចជុំវិញជម្លោះអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានធ្វើអត្ថាធិប្បាយបែបនេះ ក្នុងអំឡុងដំណើរទស្សនកិច្ចរបស់រដ្ឋមន្ត្រីការពារជាតិរុស្ស៊ីលោក Sergey Shoigu ទៅកាន់ទីក្រុង មីនស្កិ៍ កាលពីថ្ងៃសៅរ៍ទី០៣ខែធ្នូ។

លោក Lukashenko និយាយថា “ថ្ងៃនេះ យើងកំពុងរៀបចំដូចជាកងកម្លាំងតែមួយ កងទ័ពតែមួយ។ គ្រូបង្ហាត់មកពីប្រទេសទាំងពីរ កំពុងបង្វឹកកងទ័ពរបស់គ្នាទៅវិញទៅមក។ អ្នក​រាល់​គ្នា​ដឹង​រឿង​នេះ។ យើងមិនបានលាក់បាំងការពិតនេះទេ។ ជាការប្រសើរណាស់ វាមិនអាចទៅរួចឡើយក្នុងការលាក់បាំងរឿងនេះនៅក្នុងពិភពលោកសម័យទំនើប”។

លោក Lukashenko បន្តថា “ទាំងទីក្រុង មីនស្កិ៍ និងមូស្គូ មិនចង់បានសង្រ្គាមនោះទេ ប៉ុន្តែកំពុងធ្វើការជាមួយគ្នាដើម្បីទប់ទល់នឹងការឈ្លានពានណាមួយ”។

ស្របពេលជាមួយគ្នានេះដែរ រដ្ឋមន្ត្រីការពារជាតិរុស្ស៊ីលោក Shoigu បានហៅប្រទេសបេឡារុសថា ជាដៃគូដ៏គួរឲ្យទុកចិត្តសម្រាប់ប្រទេសរុស្ស៊ី ក្នុងអំឡុងកិច្ចប្រជុំជាមួយសមភាគីបេឡារុសលោក Viktor Khrenin។

លោក Shoigu បានសរសើរបេឡារុស សម្រាប់ការតាំងចិត្តដើម្បីទប់ទល់នឹងអរិភាពរបស់សហរដ្ឋអាមេរិក និងសម្ព័ន្ធមិត្ត។ លោកបន្ថែមថា អង្គភាពមកពីប្រទេសទាំងពីរ បាននិងកំពុងធ្វើឲ្យប្រសើរឡើងនូវអន្តរប្រតិបត្តិការយោធា។

បេឡារុស បានប្រកាសពីការដាក់ពង្រាយកម្លាំងរួមជាមួយរុស្ស៊ីនៅលើទឹកដីរបស់ខ្លួនកាលពីខែតុលា ដោយលើកឡើងពីភាពតានតឹងជាមួយលោកខាងលិច។

ក្រសួងការពារជាតិបេឡារុស បាននិយាយនៅពេលនោះថា ចំនួនទាហានរុស្ស៊ីដែលឈរជើងនៅក្នុងប្រទេសនេះគឺមានប្រហែល ៩០០០នាក់៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ពូទីន បញ្ជាក់ច្បាស់ៗពីមូលហេតុ ដែលរុស្ស៊ី វាយប្រហារហេដ្ឋារចនាសម្ព័ន្ធអ៊ុយក្រែន