លោក ពូទីន និយាយថា អាមេរិក បានលាតត្រដាងឲ្យឃើញពី ភាពកម្សោយរបស់ មេដឹកនាំអឺរ៉ុប (មានវីដេអូ)

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីថ្ងៃព្រហស្បតិ៍ទី១៥ខែធ្នូថា បញ្ហាសេដ្ឋកិច្ចបច្ចុប្បន្ននៅក្នុងសហភាពអឺរ៉ុប (EU)​ និងអាកប្បកិរិយាមិនរាក់ទាក់របស់សហរដ្ឋអាមេរិកចំពោះអឺរ៉ុប គឺជាបង្ហាញពីភាពកម្សោយរបស់មេដឹកនាំសហភាពមួយនេះ។ លោក​បាន​ធ្វើ​ការ​កត់​សម្គាល់​បែបនេះ ​ក្នុង​អំឡុង​កិច្ច​ប្រជុំ​ក្រុម​ប្រឹក្សា​នៃ​ប្រទេស​រុស្ស៊ី​ សម្រាប់​ការ​អភិវឌ្ឍ​យុទ្ធសាស្ត្រ និង​គម្រោង​ជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន និយាយថា “ថ្ងៃនេះ ដៃគូសំខាន់របស់ EU គឺសហរដ្ឋអាមេរិក កំពុងបន្តគោលនយោបាយដឹកនាំដោយផ្ទាល់ដល់ការរំលាយឧស្សាហកម្មរបស់អឺរ៉ុប។ ពួកគេ​ថែមទាំង​ព្យាយាម​ត្អូញត្អែរ​អំពី​រឿងនេះ ​ទៅកាន់​ចៅហ្វាយនាយ​អាមេរិក​របស់គេ​ទៀតផង”។

កាលពីដើមខែនេះ ប្រធានគណៈកម្មការអឺរ៉ុបលោកស្រី Ursula von der Leyen បានបង្ហាញក្តីបារម្ភចំពោះគោលនយោបាយសេដ្ឋកិច្ចរបស់សហរដ្ឋអាមេរិក ដោយជំរុញឲ្យ EU ចាត់វិធានការ ប្រសិនបើខ្លួនចង់ប្រកួតប្រជែងជាមួយឧស្សាហកម្មបៃតង ដែលឧបត្ថម្ភដោយរដ្ឋាភិបាលសហរដ្ឋអាមេរិក។

លោកស្រី Von der Leyen បានរិះគន់ការផ្តាច់ពន្ធសម្រាប់អ្នកប្រើប្រាស់ដែលទិញផលិតផលអាមេរិក ដែលនេះជាវិធានការណែនាំនៅក្រោមច្បាប់កាត់បន្ថយអតិផរណា (IRA) ចុះហត្ថលេខាដោយលោកប្រធានាធិបតី ចូ បៃដិន កាលពីខែសីហា។

លោកស្រី​បាន​ព្រមាន​ថា ​គំនិត​ផ្តួចផ្តើម​បែប​នេះ​ អាច​​នាំឲ្យ​មាន​ការ​ប្រកួតប្រជែង​មិន​ស្មើភាព​ អាច​បិទ​ទីផ្សារ​ ហើយ​អាចបំបែក​ខ្សែសង្វាក់​ផ្គត់ផ្គង់​សំខាន់​ៗ​។

ស្របពេលជាមួយគ្នានោះ មន្ត្រីជាន់ខ្ពស់ EU ផ្សេងទៀតបានសម្តែងក្តីព្រួយបារម្ភម្តងហើយម្តងទៀត អំពីវិបត្តិសេដ្ឋកិច្ចដែលនឹងមកដល់ និងសក្តានុពលនៃការបំផ្លិចបំផ្លាញឧស្សាហកម្មដែលមានរយៈពេលច្រើនទសវត្សរ៍។

លោក ពូទីន បានកត់សម្គាល់ថា វិបត្តសេដ្ឋកិច្ចនៅ​​ EU ភាគច្រើនកើតចេញពីសកម្មភាពរបស់ប្លុកនេះផ្ទាល់ ដោយសារតែការផ្តោតលើប្រទេសរុស្ស៊ី ជាមួយនឹងទណ្ឌកម្មជុំវិញជម្លោះអ៊ុយក្រែន។

លោកបានកត់សម្គាល់ថា “តើ​អឺរ៉ុប​ខ្លួន​ឯង​សម្រេច​បាន​អ្វី​ខ្លះ​ដោយ​ការ​ដាក់​កំហិតនេះ? ជាដំបូង អឺរ៉ុបមានអតិផរណាដែលមិនធ្លាប់មានពីមុនមក ដូចដែលអ្នកសេដ្ឋកិច្ចបាននិយាយអ៊ីចឹង អតិផរណាកើនឡើងខ្ពស់នៅក្នុងផ្ទះរបស់ពួកគេ គឺតំបន់ចាយប្រាក់អឺរ៉ូ។ នៅក្នុងខែវិច្ឆិកា អតិផរណាមានចំនួន ១០% នៅក្នុងតំបន់ចាយប្រាក់អឺរ៉ូទាំងមូល ខណៈប្រទេសខ្លះបង្ហាញតួលេខខ្លាំងជាង ២០% ឬឈានដល់ ២៥%”។

ក្នុងពេលជាមួយគ្នានោះ លោកខាងលិចនៅតែបន្តកិច្ចខិតខំប្រឹងប្រែង ដើម្បីដណ្តើមយកធនធានសម្រាប់ខ្លួនឯង។ លោកខាងលិចបានទាញភួយយកទៅដណ្តប់ខ្លួនឯងដោយឥតអៀនខ្មាស ខុសពីរុស្ស៊ី ដែលកំពុងជួយរដ្ឋក្រីក្របំផុតនៅអាហ្រ្វិក អាស៊ី និងតំបន់ផ្សេងទៀតតាមរយៈ ការផ្តល់អាហារ និងទំនិញផ្សេងទៀត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ រឿងម្យ៉ាង ធ្វើឲ្យពិភពលោក ភ័យខ្លាចថា បេឡារុស នឹងចូលរួមក្នុងសង្គ្រាមអ៊ុយក្រែនឆាប់ៗនេះ