ព័ត៌មានអន្ដរជាតិ

អាមេរិក បញ្ចេញឯកសារសម្ងាត់ ពាក់ព័ន្ធការធ្វើឃាតអតីតប្រធានាធិបតី John F. Kennedy

បានផុស

២ years មុន

នៅ

ថ្ងៃសុក្រ ១៦ ធ្នូ ២០២២

ដោយ

ឯកសារសម្ងាត់ថ្មី ទាក់ទងនឹងការធ្វើឃាតអតីតប្រធានាធិបតីអាមេរិក John F. Kennedy កាលពីខែវិច្ឆិកាឆ្នាំ១៩៦៣ ត្រូវបានបញ្ចេញនៅថ្ងៃសុក្រទី១៦ខែធ្នូនេះ ប៉ុន្តែសេតវិមានបានរក្សាទុកឯកសាររាប់ពាន់វិញ ដោយលើកឡើងពីកង្វល់សន្តិសុខជាតិ។

លោក Kennedy ត្រូវបានបាញ់សម្លាប់អំឡុងពេលធ្វើដំណើរទៅទីក្រុង Dallas រដ្ឋ Texas ក្នុងឆ្នាំ ១៩៦៣

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណៈកម្មាការ Warren ដែលស៊ើបអង្កេតការបាញ់ប្រហារអតីតប្រធានាធិបតីអាយុ៤៦ឆ្នាំបានកំណត់ថា ការធ្វើឃាតនោះ ត្រូវបានអនុវត្តដោយអតីតអ្នកបាញ់កាំភ្លើងនៃកងម៉ារីនលោក Lee Harvey Oswald ដែលគាត់ធ្វើសកម្មភាពតែម្នាក់ឯងប៉ុណ្ណោះ។

បណ្ណសារជាតិ និយាយថា ឯកសារសរុបចំនួន ១៣១៧៣សន្លឹក ត្រូវបានផ្សព្វផ្សាយជាសាធារណៈ នៅថ្ងៃសុក្រ ហើយថា ៩៧% នៃកំណត់ត្រារបស់លោក Kennedy ដែលសរុបមានប្រហែល៥លានទំព័រ ឥឡូវនេះត្រូវបានផ្សព្វផ្សាយជាសាធារណៈ។

ពីរថ្ងៃបន្ទាប់ពីការធ្វើឃាតលោក Kennedy, លោក Oswald ត្រូវបានបាញ់សម្លាប់ដោយម្ចាស់ក្លឹបរាត្រី Jack Ruby ខណៈពេលគាត់ត្រូវបានគេផ្ទេរចេញពីពន្ធនាគារក្នុងទីក្រុង។

ឯកសារមួយចំនួនធំដែលចេញផ្សាយនៅថ្ងៃសុក្រនេះ គឺជាប់ទាក់ទងទៅនឹងលោក Oswald, ការធ្វើដំណើរអន្តរជាតិ និងទំនាក់ទំនងរបស់គាត់ក្នុងរយៈពេលប៉ុន្មានឆ្នាំ មុនការធ្វើឃាតលោក Kennedy។

លោក Oswald បានភៀសខ្លួនទៅសហភាពសូវៀតក្នុងឆ្នាំ១៩៥៩ ប៉ុន្តែបានត្រលប់ទៅសហរដ្ឋអាមេរិកវិញក្នុងឆ្នាំ១៩៦២។

ក្នុងចំណោមឯកសារដែលចេញផ្សាយកាលពីថ្ងៃព្រហស្បតិ៍ មានឯកសារមួយយកចេញពីឆ្នាំ១៩៩០ ដែលរៀបរាប់ពីសេចក្តីសង្ខេបរបស់អតីតមន្ត្រីទីភ្នាក់ងារសន្តិសុខសហភាពសូវៀត (KGB) ដែលនិយាយថា លោក Oswald ត្រូវបានតាមរកដោយ KGB បន្ទាប់ពីរត់ចោលជួរ។

ទោះបីជាយ៉ាងណាក៏ដោយ មន្ត្រីដដែលនិយាយថា KGB មិនមានទំនាក់ទំនងអ្វីទៀតទេជាមួយ Oswald បន្ទាប់ពីគាត់ត្រលប់ទៅសហរដ្ឋអាមេរិកវិញ ក្រោយទទួលរងនូវជំងឺធ្លាក់ទឹកចិត្ត និងនឹកផ្ទះ ហើយ KGB មិនដែលប្រគល់ភារកិច្ចឲ្យគាត់សម្លាប់ប្រធានាធិបតី Kennedy ឡើយ។

ឯកសារមួយទៀតពីឆ្នាំ១៩៩១ ដែលដកស្រង់ប្រភព KGB បាននិយាយថា លោក Oswald មិនមែនជាភ្នាក់ងារគ្រប់គ្រងដោយ KGB ទេបើទោះបីជា KGB តាមដានគាត់យ៉ាងជិតស្និទ្ធនិងជានិច្ចជាកាល ខណៈពេលគាត់ស្ថិតនៅក្នុងសហភាពសូវៀតក៏ដោយ។

គួរបញ្ជាក់ថា ការចេញផ្សាយឯកសារនេះ គឺអនុលោមទៅតាមច្បាប់សភាថ្ងៃទី២៦ខែតុលា ឆ្នាំ ១៩៩២ ដែលតម្រូវឲ្យកំណត់ត្រាការធ្វើឃាតដែលមិនបានកែប្រែនៅក្នុងបណ្ណសារជាតិ ត្រូវចេញផ្សាយពេញលេញក្នុងរយៈពេល២៥ឆ្នាំក្រោយ៕

ប្រែសម្រួល៖ Vann Vann

ប្រភព៖ Times of Malta

ចុចអាន៖ ការបោះឆ្នោតស្ទង់មតិ ៖ ពលរដ្ឋ អាមេរិក មិនចង់ឲ្យលោក បៃដិន ឈរឈ្មោះ សម្រាប់អាណត្តិទី ២