អ៊ុយក្រែន ថា រុស្ស៊ី កំពុងបង្វែរជម្លោះទៅជាការប្រឈមមុខដាក់គ្នាដោយ​ប្រដាប់អាវុធរយៈពេលយូរ

មន្ត្រីជាន់ខ្ពស់អ៊ុយក្រែន លោកឧត្តមសេនីយទោ Oleksiy Gromov បានប្រាប់សន្និសីទសារព័ត៌មានមួយកាលពីថ្ងៃសុក្រថា “វិមានក្រឹមឡាំមកំពុងស្វែងរកការបង្វែរជម្លោះជាមួយអ៊ុយក្រែន ទៅជាការប្រឈមមុខដាក់គ្នាដោយប្រដាប់អាវុធដ៏យូរ” ។

លោកឧត្តមសេនីយបាននិយាយថា ទីក្រុងមូស្គូកំពុងជីកកកាយក្នុងសង្រ្គាមដ៏យូរមួយ ហើយនៅតែចង់ដណ្តើមយកទឹកដីអ៊ុយក្រែនទាំងមូល ស្របពេលដែលកងកម្លាំងរុស្ស៊ីបានវាយលុកទីក្រុងយុទ្ធសាស្ត្រចំនួន ២ ហើយកងទ័ពរបស់ទីក្រុងកៀវបានបាញ់ផ្លោងទៅលើតំបន់ Donetsk នៅភាគខាងកើតដែលគ្រប់គ្រងដោយរុស្ស៊ីក៏ដោយ ។

លោក Gromov បាននិយាយថា “គោលដៅយុទ្ធសាស្ត្រសំខាន់របស់សត្រូវនៅតែដណ្ដើមយកទឹកដីទាំងអស់នៃប្រទេសរបស់យើង ហើយពួកគេមិនអនុញ្ញាតឲ្យមានសមាហរណកម្ម អឺរ៉ុប-អាត្លង់ទិក របស់អ៊ុយក្រែនឡើយ បន្ទាប់ពីភាគីទាំងសងខាងបានច្រានចោលបទឈប់បាញ់ថ្ងៃបុណ្យណូអែល ហើយបច្ចុប្បន្នមិនមានការចរចាណាមួយក្នុងគោលបំណងបញ្ចប់ជម្លោះជិត ១០ ខែមកនេះនោះទេ” ។

លោកឧត្តមសេនីយបញ្ជាក់ថា គោលដៅសំខាន់របស់ទីក្រុងមូស្គូនៅតែផ្តោតលើទីក្រុង Bakhmut និង Avdiivka ភាគខាងកើត ប៉ុន្តែក៏កំពុងវាយលុកជារៀងរាល់ថ្ងៃលើទីក្រុង Kherson ភាគខាងត្បូង និងព្យាយាមដណ្តើមទីតាំងដ៏រឹងមាំនៅក្នុងតំបន់ Zaporizhia ភាគខាងត្បូងផងដែរ ។

គួរបញ្ជាក់ថា គិតត្រឹមដើមសប្ដាហ៍នេះ ចំនួនជនស៊ីវិលក្នុងសង្រ្គាមរវាងទីក្រុងមូស្គូ និងទីក្រុងកៀវដែលកំពុងបន្ត បានកើនឡើងដល់ ១៧,៣៦២ នាក់ហើយ ក្នុងនោះមានអ្នកស្លាប់ចំនួន ៦,៧៥៥ នាក់ និងរបួស ១០,៦០៧ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera