ម្ចាស់ភាគហ៊ុន Tesla៖ ទង្វើ Elon Musk គឺកំពុងសម្លាប់ Tesla ហើយ

ម្ចាស់ភាគហ៊ុន Tesla និយាយទៅកាន់ Elon Musk ថា ទង្វើរបស់លោក Musk ជាមួយភាពច្របូកច្របល់ការងារ គឺកំពុងតែសម្លាប់​ក្រុមហ៊ុន Tesla ហើយ។

លោក Joe Cirincione ដែលជាអ្នកវិភាគ និងជាអ្នកនិពន្ធផ្នែកសន្តិសុខជាតិក៏ជាម្ចាស់ភាគហ៊ុនមួយផ្នែក បានសរសេរនៅលើ Twitter កាលពីថ្ងៃសុក្រថា គាត់ចង់ឱ្យ Musk ចាកចេញពី Twitter ដោយគាត់បញ្ជាក់ថា ចាប់តាំងពី Musk ទិញ Twitter មក តម្លៃភាគហ៊ុន Tesla របស់លោកបានធ្លាក់ចុះជាងពាក់កណ្តាល។

ដោយឡែក លោក KoGuan Leo ដែលជាម្ចាស់ភាគហ៊ុនធំរបស់ Tesla បាននិយាយនៅក្នុង tweet ដែរថា Musk គឺបានបោះបង់ទំនួលខុសត្រូវរបស់គាត់ចំពោះក្រុមហ៊ុន Tesla ហើយលោកក៏អំពាវនាវឱ្យមាននាយកប្រតិបត្តិថ្មីជំនួសលោក Musk ដែលអាចមានពេលវេលាគ្រប់គ្រាន់កាន់កាប់ក្រុមហ៊ុន។

ទាក់ទិនជាមួយលោក Musk វិញ ដោយនៅក្នុងសប្តាហ៍នេះ គឺកំពុងតែស្ថិតនៅក្រោមការត្រួតពិនិត្យបន្ថែមទៀត សម្រាប់ការព្យួរអ្នកកាសែតដែលរិះគន់លោកនៅលើវេទិការ Twitter ហើយ Musk ក៏បាននិយាយថា លោកនឹងបញ្ចូលគណនីរបស់អ្នកកាសែតឡើងវិញនៅថ្ងៃសុក្របន្ទាប់ពីការស្ទង់មតិដែលបាន tweet ទៅកាន់អ្នកតាមដានរបស់លោក៕

ប្រែសម្រួលដោយ៖ នាង រតនៈ

ប្រភព៖ Business Insider