ព័ត៌មានអន្ដរជាតិ

ឆេះរោងចក្រកែច្នៃកាកសំណល់(អេតចាយ) ផ្អើលពលរដ្ឋក្នុងខេត្តឈុនបុរីទាំងយប់

បានផុស

២ years មុន

នៅ

ថ្ងៃអង្គារ ២០ ធ្នូ ២០២២

ដោយ

ប្រទេសថៃ ៖ រោងចក្រកែច្នៃកាកសំណល់គ្រប់ប្រភេទដ៏ធំមួយប្រចាំខេត្តឈុនបុរី (អេតចាយ) ទៅជារបស់ប្រើប្រាស់ ត្រូវបានអគ្គិភ័យលេបត្របាក់ទាំងស្រុង បង្កជាហានិភ័យដល់ប្រជាពលរដ្ឋដែលរស់នៅក្នុងតំបន់នោះយ៉ាងខ្លាំង ដោយសារតែផ្សែង និងកម្ទេចផេះ ហុយពាសវាលពាសកាលទៅតាមកម្លាំងខ្យល់ខ្លាំងពេក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ នៃគ្រោះអគ្គិភ័យនេះ បានកើតឡើងកាលពីវេលាម៉ោង ៧ និង ២២ នាទី យប់ថ្ងៃទី ១៩ ខែធ្នូ ឆ្នាំ ២០២២ ត្រង់ចំណុចរោងចក្រ រីសៃខឹន ស្ថិតក្នុងឃុំបរវីន ស្រុកស៊ីរ៉ាឆា ខេត្តឈុនបុរី ប្រទេសថៃ។

តាមការបញ្ជាក់ពីគេហទំព័រមួយចំនួនដែលបានបង្ហោះភ្លាមៗ បានឲ្យដឹងថា រោងចក្រនេះគឺជាកន្លែងកែច្នៃកាកសំណល់ និងរបស់ចាស់ៗគ្រប់ប្រភេទ (អេតចាយ) ទៅជារបស់ប្រើប្រាស់ផ្សេងៗ ដើម្បីលក់ទៅលើទីផ្សារវិញ។ រោងចក្រនេះមានទំហំធំនៅក្នុងចំណោមរោងចក្រមួយចំនួន ក្នុងប្រទេសថៃ ។

នៅហេតុការណ៍នោះដែរ គេសង្កេតឃើញថា មានរថយន្តពន្លត់អគ្គិភ័យមកពីតំបន់នានា ដែលនៅក្បែរខាង សរុបជាង ២០ គ្រឿង ក្នុងការជួយពន្លត់ និងទប់ស្កាត់កុំឲ្យរាលដាលទៅទីតាំងផ្សេងទៀត ហើយការពន្លត់នេះប្រើរយៈពេលរាប់ម៉ោងនៅតែមិនទាន់គ្រប់គ្រងស្ថានការណ៍បាន ដោយសារតែអណ្ដាតភ្លើង និងផ្សែងខ្លាំងពេក។ ដោយឡែក ចំនួនមនុស្សដែលគ្រោះថ្នាក់ និងការខាតបង់ យើងនៅមិនទាន់ទទួលបានរបាយការណ៍នៅឡើយ៕

អត្ថបទ ៖ សោ និយមរ័ត្ន