កាតា បញ្ជាក់ជាថ្មីដល់សភាអឺរ៉ុប រឿងពុករលួយធ្វើម្ចាស់ផ្ទះ World Cup

ប្រទេសកាតាកាលពីពេលថ្មីៗនេះបានបញ្ជាក់ជាថ្មីថា ប្រទេសនេះបានបដិសេធការជាប់ពាក់ព័ន្ធក្នុងសំណុំរឿងពុករលួយដែលត្រូវបានស៊ើបអង្កេតដោយអាជ្ញាធរប៊ែលហ្ស៊ិក ជុំវិញ​ការប្រកួត​បាល់ទាត់​ពិភពលោក​ឆ្នាំ ២០២២ ដែល​ប្រទេសកាតាធ្វើជាម្ចាស់ផ្ទះ ។

អាជ្ញាធរបែលហ្ស៊ិកបានចោទប្រកាន់មនុស្ស ៤ នាក់ដែលមានទំនាក់ទំនងជាមួយសភាអឺរ៉ុប ជាពិសេសគឺលោកស្រី Eva Kaili អនុប្រធានសភាអឺរ៉ុប ជុំវិញការចោទប្រកាន់អំពើពុករលួយ និងលាងលុយកង្វក់ ក៏ដូចជាបានផ្តល់សំណូកដល់អ្នកនយោបាយ EU ផ្សេងទៀត ឲ្យកាតាធ្វើជាម្ចាស់ផ្ទះ World Cup ខណៈកាតាតែងតែ​បដិសេធ​ថា ​មិន​បាន​ប្រព្រឹត្ត​ខុស​នោះ​ទេ ។

ពាក់ព័ន្ធនឹងបញ្ហានេះដែរ បេសកជនរបស់ប្រទេសកាតាប្រចាំសហភាពអឺរ៉ុបបានចេញសេចក្តីថ្លែងការណ៍មួយថា “ប្រទេសកាតារងការរិះគន់ និងវាយប្រហារទាំងស្រុងនៅក្នុងការស៊ើបអង្កេត ហើយមានការខកចិត្តយ៉ាងខ្លាំងដែលរដ្ឋាភិបាលបែលហ្ស៊ិកមិនបានខិតខំប្រឹងប្រែងចូលរួមជាមួយរដ្ឋាភិបាលរបស់យើងដើម្បីបង្កើតការពិតនោះ” ។

ជាចុងក្រោយសេចក្តីថ្លែងការណ៍បានបន្ថែមថា “ការកំណត់ការសន្ទនា និងកិច្ចសហប្រតិបត្តិការលើបញ្ហានេះ មុនពេលដំណើរការច្បាប់មួយត្រូវបានបញ្ចប់ នឹងជះឥទ្ធិពលអវិជ្ជមានដល់កិច្ចសហប្រតិបត្តិការសន្តិសុខ និងការពិភាក្សាស្តីពីសន្តិសុខថាមពលពិភពលោកផងដែរ” ៕

ប្រែសម្រួលដោយ ៖ ជីវ័ន្ត

ប្រភព ៖ Reuters

ចុចអាន ៖ សរុបព្រឹត្តិការណ៍ខ្លះៗ និងរឿងរ៉ាវប្លែកៗក្នុងការប្រកួតបាល់ទាត់ World Cup នៅកាតា