លោក ប្រាយុទ្ធ ត្រេកអរខ្លាំង ក្នុងរយៈពេល ១១ខែ ថៃទទួលបានទុនវិនិយោគជាង ៣ពាន់លានដុល្លារ

នាយករដ្ឋមន្ត្រីថៃ លោក ប្រាយុទ្ធ ចាន់អូចា បានសម្តែងក្តីរីករាយស្វាគមន៍ចំពោះអ្នកវិនិយោគបរទេសដែលមកបណ្តាក់ទុននៅប្រទេសថៃក្នុងរយៈពេល ១១ខែនៃឆ្នាំ២០២២នេះ ជាមួយនឹងវិនិយោគរហូតដល់ជាង ១១២ពាន់លានបាត ( ប្រហែល ៣.២ពាន់លានដុល្លារអាមេរិក) គឺកើនឡើង ៧៤%។

នៅថ្ងៃទី២២ ខែធ្នូ ឆ្នាំ២០២២ លោក អានុឆា បូរ៉ាផាត់ឆៃស៊ី អ្នកនាំពាក្យរដ្ឋាភិបាលថៃបាននិយាយថា ចំនួននៃការវិនិយោគបរទេសនៅក្នុងប្រទេសថៃក្នុងរយៈពេល ១១ខែនៃឆ្នាំ២០២២ (ខែមករា ដល់ខែវិច្ឆិកា) មានទឹកប្រាក់សរុបជាង ១១២,៤៦៦លានបាត កើនឡើង៧៤% បើធៀបនឹងរយៈពេលដូចគ្នាក្នុងឆ្នាំ២០២១ ដែលបានបង្កើតការងារដល់បុគ្គលិកជនជាតិថៃជាង ៥០០០នាក់។

ទន្ទឹមគ្នានេះលោកនាយករដ្ឋមន្ត្រី ប្រាយុទ្ធ ចាន់អូចា ក៏បានសម្តែងក្តីត្រេកអរស្វាគមន៍ចំពោះអ្នកវិនិយោគបរទេសដែលនៅតែជឿជាក់លើសក្តានុពលសេដ្ឋកិច្ចរបស់ប្រទេសថៃ និងបន្តពង្រីកការវិនិយោគរបស់ខ្លួនជាបន្តបន្ទាប់។ ជាមួយគ្នានេះលោក ប្រាយុទ្ធ ក៏បានថ្លែងអំណរគុណផងដែរចំពោះស្ថាប័នពាក់ព័ន្ធដែលបានឆ្លើយតប និងអនុវត្តន៍យ៉ាងសកម្មនូវគោលនយោបាយរបស់រដ្ឋាភិបាល ដែលធ្វើឱ្យសេដ្ឋកិច្ចថៃមានសញ្ញាវិជ្ជមានជាបន្តបន្ទាប់ងើបឡើងវិញយ៉ាងឆាប់រហ័ស សាងទំនុកចិត្តក្នុងចំណោមវិនិយោគិនបរទេស និងបង្កើតការងារដល់ប្រជាជនថៃ។

អ្នកនាំពាក្យដដែលបានបញ្ជាក់ថា ចាប់ពីខែមករា ដល់ខែវិច្ឆិកា ឆ្នាំ២០២២ ក្រសួងពាណិជ្ជកម្មថៃបានអនុញ្ញាតឱ្យជនបរទេសចំនួន ៥៣០នាក់មកបណ្តាក់ទុនធ្វើអាជីវកម្មនៅប្រទេសថៃ ក្នុងនោះជនបរទេសដែលវិនិយោគច្រើនជាងគេលំដាប់ទី១៖ គឺប្រទេសជប៉ុនចំនួន ១៣៧នាក់ ស្មើនឹង២៦% ដែលមានទុនវិនិយោគ ៣៩,០០០លានបាត លំដាប់ទី២៖ គឺសិង្ហបុរីចំនួន ៨៥នាក់ ស្មើនឹង១៦% ដែលមានទុនវិនិយោគ ១១,៩៩៩លានបាត និងទី៣៖ គឺសហរដ្ឋអាមេរិកចំនួន ៧០នាក់ ស្មើនឹង១៣% ដែលមានទុនវិនិយោគ ៣,៣៤៣លានបាត៕

ប្រែសម្រួល៖ គង់ សំអាន

ប្រភព៖ prachachat

ចុចអាន៖ លោក ពូទីន ច​ង់បញ្ចប់សង្រ្គាមនៅអ៊ុយក្រែន ឆាប់ៗ