ដ្រូនអ៊ុយក្រែន វាយប្រហារមូលដ្ឋានយន្តហោះទម្លាក់គ្រាប់បែករុស្ស៊ី 

ទីក្រុងមូស្គូបាននិយាយថា ការវាយប្រហារដោយដ្រូនរបស់អ៊ុយក្រែនលើមូលដ្ឋានយន្តហោះទម្លាក់គ្រាប់បែក Engels នៅភាគខាងត្បូងប្រទេសរុស្ស៊ី បានបណ្តាលឲ្យមនុស្ស៣នាក់ស្លាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ ប្រព័ន្ធការពារដែនអាកាស បានបាញ់ទម្លាក់ដ្រូន ប៉ុន្តែកម្ទេចកម្ទីដែលធ្លាក់ បណ្តាលឲ្យមានទាហានស្លាប់ និងរងរបួសក្នុងការវាយប្រហារពេញមួយយប់។

ប្រទេសរុស្ស៊ី ​បាន​ចោទ​អ៊ុយក្រែន​ ពី​ការ​វាយ​ប្រហារ​ស្រដៀង​គ្នា​នេះ ​លើ​អាកាសយានដ្ឋានមួយកន្លែង ​ដែលផ្ទុក​យន្តហោះ​ទម្លាក់​គ្រាប់បែក​យុទ្ធសាស្ត្រ​កាលពី​ថ្ងៃ​ទី០៥ធ្នូ។ មូលដ្ឋាននោះ ស្ថិតនៅចម្ងាយប្រហែល៥០០គីឡូម៉ែត្រ ភាគខាងជើងឆៀងខាងកើតនៃព្រំដែនជាមួយអ៊ុយក្រែន។

យោធា​អ៊ុយក្រែន​មិន​បាន​ធ្វើ​អត្ថាធិប្បាយ​ជា​ផ្លូវ​ការ​ លើ​ការ​វាយ​ប្រហារ​ទាំង​នោះ​ទេ។

ក្រសួងការពារជាតិរុស្ស៊ីបាននិយាយថា ខែលការពារដែនអាកាសរបស់ខ្លួន បានបាញ់ទម្លាក់ដ្រូនអ៊ុយក្រែនដែលហោះហើរក្នុងរយៈកម្ពស់ទាប នៅម៉ោងប្រហែល០១:៣៥ម៉ោងក្នុងស្រុកនៅថ្ងៃចន្ទទី២៦ខែធ្នូនេះ។

ទោះបីជាយ៉ាងណាក៏ដោយ អភិបាលនៃតំបន់ Saratov បាននិយាយថា “មិនមានការគំរាមកំហែងដល់ប្រជាជនក្នុងតំបន់នោះទេ”។

គួរបញ្ជាក់ថា មូលដ្ឋានទ័ពអាកាស Engels ត្រូវបានរុស្ស៊ីប្រើប្រាស់ម្តងហើយម្តងទៀត ដើម្បីវាយប្រហារដោយមីស៊ីលលើគោលដៅផ្សេងៗក្នុងប្រទេសអ៊ុយក្រែន ចាប់តាំងពីទីក្រុងមូស្គូបើកការលុកលុយកាលពីថ្ងៃទី ២៤ខែកុម្ភៈមក៕

ប្រែសម្រួល៖ Vann Vann

ប្រភព៖ BBC

ចុចអាន៖ អ៊ុយក្រែន ភ័យកាន់តែខ្លាំង ពេលលោក ពូទីន ធ្វើដំណើរទៅ បេឡារុស