អគារប៉ុស្តិ៍ទូរទស្សន៍លេខ ៣ ថៃត្រូវបិទទ្វារ ក្រោយបុគ្គលិកឆ្លងកូវីដ

អគារប៉ុស្តិ៍ទូរទស្សន៍លេខ ៣ ថៃឈ្មោះ Maleenon 2 នៅផ្លូវ Rama ទី ៤ ត្រូវបានបិទទ្វារកាលពីយប់ថ្ងៃព្រហស្បតិ៍ បន្ទាប់ពីបុគ្គលិករបស់ខ្លួនបានធ្វើតេស្តវិជ្ជមានជំងឺកូវីដ ១៩ ។

ពិធីការិនីប៉ុស្តិ៍លេខ ៣ នាង Pitchayatan Chanput នៅព្រឹកថ្ងៃសុក្រនេះបានប្រកាសបិទអគារទូរទស្សន៍នេះដោយនិយាយថា អ្នករចនាក្រាហ្វិចម្នាក់ដែលធ្វើការនៅជាន់ទី ៥ និងទី ៦ នៃអគារមានជំងឹកូវីដ ១៩ ។

អគារនេះត្រូវបានបិទនៅម៉ោង ១០ យប់ថ្ងៃព្រហស្បតិ៍ ។ បុគ្គលិកនៅជាន់ទាំងពីរត្រូវបានគេចាត់ទុកថាមានហានិភ័យខ្ពស់ក្នុងការឆ្លងជំងឺនេះ ។ នាងបាននិយាយថា អ្នកទាំងអស់នឹងត្រូវបានធ្វើតេស្តរកជំងឺកូវីដ ១៩ នៅចំណតរថយន្តនៅខាងក្រៅអាគារ ។

កញ្ញា Pitchayatan បាននិយាយថា បុគ្គលិកនៅជាន់ផ្សេងទៀតត្រូវបានគេចាត់ទុកថាមានហានិភ័យទាបនៃការឆ្លង ខណៈនាងបានធ្វើការនៅជាន់ទី ៩ ។

នាងបាននិយាយថា ជណ្តើរយន្តគឺជាកត្តាហានិភ័យនៅក្នុងអគារ ប៉ុន្តែវាត្រូវបានបាញ់ថ្នាំសម្លាប់មេរោគជាទៀងទាត់ ហើយអគារទូរទស្សន៍ប៉ុស្តិ៍លេខ ៣ ថៃត្រូវបានសម្អាតជាប្រចាំ ហើយការគ្រប់គ្រងមួយចំនួនក៏បានដាក់ចេញនូវគោលការណ៍ធ្វើការងារពីផ្ទះដើម្បីកាត់បន្ថយភាពចង្អៀតនៅកន្លែងធ្វើការ ។

គួរបញ្ជាក់ថា គិតត្រឹមពេលនេះប្រទេសថៃមានករណីឆ្លងជំងឺកូវីដ ១៩ ចំនួន ៩,៨៤១ ករណី និងមានអ្នកស្លាប់ ៦៧ នាក់ដដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post