តៃវ៉ាន់ ថា ចិន បើកការ​លុកលុយ​យោធា​ទ្រង់ទ្រាយ​ធំ​បំផុត 

រដ្ឋាភិបាលតៃវ៉ាន់និយាយថា ប្រទេសចិន បានបើកការលុកលុយធំបំផុត នៅក្នុងសមុទ្រ និងផ្ទៃមេឃជុំវិញកោះតៃវ៉ាន់។

ខ្លួននិយាយថា យន្តហោះរបស់កងទ័ពអាកាសចិនចំនួន៧១គ្រឿង រួមទាំងយន្តហោះចម្បាំង និងយន្តហោះគ្មានមនុស្សបើកផងដែរ បានហោះចូលទៅក្នុងតំបន់ ដែលហៅថាជា តំបន់កំណត់អត្តសញ្ញាណការពារដែនអាកាសរបស់តៃវ៉ាន់។

ស្របពេលជាមួយគ្នានោះ សហរដ្ឋ​អាមេរិក​​និយាយ​ថា សកម្មភាព​យោធា​របស់​ប្រទេស​ចិន​កំពុង​តែ​បង្ក អស្ថិរភាព និង​បំផ្លាញសន្តិភាព​និង​ស្ថិរភាព​ក្នុង​តំបន់។

មន្ត្រីក្រុមប្រឹក្សាសន្តិសុខជាតិរបស់សេតវិមានបាននិយាយថា “សហរដ្ឋអាមេរិកមានក្តីព្រួយបារម្ភចំពោះការអភិវឌ្ឍន៍ចុងក្រោយនេះ។ ខ្លួននឹងបន្តជួយតៃវ៉ាន់ក្នុងការរក្សានូវសមត្ថភាពការពារគ្រប់គ្រាន់ ស្របតាមការប្តេជ្ញាចិត្តដ៏យូរអង្វែងរបស់យើង និងស្របតាមគោលនយោបាយចិនតែមួយរបស់យើង”។

កោះតៃវ៉ាន់គឺ​គ្រប់គ្រង​ដោយ​ខ្លួនឯង ប៉ុន្តែ​ចិន​មើល​ឃើញ​ថា កោះនេះ​ជា​ខេត្ត​បំបែកខ្លួន ​ដែល​នឹង​រួបរួម​គ្នា​ឡើងវិញនៅថ្ងៃណាមួយ។

ភាពតានតឹងរវាងភាគីទាំងពីរ បានកើនឡើងជាលំដាប់ក្នុងរយៈពេលប៉ុន្មានខែថ្មីៗនេះ។

កាលពីខែសីហា ទីក្រុងប៉េកាំង ខឹងសម្បាយ៉ាងខ្លាំងចំពោះដំណើរទស្សនកិច្ចទៅកាន់កោះនេះដោយប្រធានសភាតំណាងរាស្រ្តអាមេរិកលោកស្រី Nancy Pelosi។ លោកស្រីជាអ្នកនយោបាយជាន់ខ្ពស់បំផុតរបស់សហរដ្ឋអាមេរិក ដែលបានទៅទស្សនកិច្ចកោះតៃវ៉ាន់ក្នុងរយៈពេល២៥ឆ្នាំ។

ប្រទេសចិនបានឆ្លើយតបទៅនឹងដំណើរទស្សនកិច្ចនោះ ដោយការធ្វើសមយុទ្ធយោធាធំបំផុតមិនធ្លាប់មាន នៅសមុទ្រជុំវិញកោះតៃវ៉ាន់ ហើយថែមទាំងបានបិទពាណិជ្ជកម្មមួយចំនួនជាមួយកោះនេះទៀតផង៕

ប្រែសម្រួល៖ Vann Vann

ប្រភព៖ BBC

ចុចអាន៖ ចិន ធ្វើសមយុទ្ធយោធាក្បែរកោះតៃវ៉ាន់ ដើម្បីឆ្លើយតបទៅ អាមេរិក