រុស្ស៊ី ដាក់ឱសានវាទដល់ អ៊ុយក្រែន

រដ្ឋមន្ត្រីការបរទេសរុស្ស៊ីលោក Sergey Lavrov បានដាក់ឱសានវាទដល់អ៊ុយក្រែន។ នោះគឺឲ្យពួកគេបំពេញតាមការទាមទាររបស់ទីក្រុងមូស្គូ រួមទាំងការចុះចាញ់នៅទឹកដី ដែលរុស្ស៊ីកំពុងគ្រប់គ្រងនាពេលនេះផងដែរ បើមិនដូច្នេះទេកងទ័ពរុស្ស៊ីនឹងសម្រេចជោគវាសនារបស់អ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយថ្ងៃ បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយម្តងទៀតថា លោកបើកចំហចំពោះកិច្ចចរចាសន្តិភាពនោះ, លោក Lavrov បានប្រាប់ទីក្រុង កៀវ ថា ពួកគេគួរតែធ្វើតាមការចង់បានរបស់ទីក្រុងមូស្គូ ដើម្បីប្រយោជន៍ផ្ទាល់ខ្លួន។

ទីភ្នាក់ងារព័ត៌មានរដ្ឋ TASS បានដកស្រង់សម្តីលោក Lavrov ថា “សំណើរបស់យើងសម្រាប់ការរំសាយកងទ័ព និងលុបបំបាត់មនោគមន៍វិជ្ជាក្នុងទឹកដីដែលគ្រប់គ្រងដោយរបបនេះ, ការលុបបំបាត់ការគំរាមកំហែងដល់សន្តិសុខរបស់រុស្ស៊ីដែលចេញពីទីនោះ រួមទាំងទឹកដីថ្មីរបស់យើងផងដែរ ត្រូវបានគេដឹងយ៉ាងច្បាស់។ រឿងគឺសាមញ្ញ៖ បំពេញការទាមទារទាំងនេះ ដើម្បីប្រយោជន៍ផ្ទាល់ខ្លួនរបស់អ្នក បើ​មិន​ដូច្នេះ​ទេ បញ្ហា​នឹង​ត្រូវ​សម្រេច​ដោយ​កងទ័ព​រុស្ស៊ី”។

នៅពេលសួរដោយសារព័ត៌មាន TASS ថាតើជម្លោះនឹងអូសបន្លាយពេលប៉ុន្មានទៀត? លោក Lavrov ឆ្លើយថា “បាល់គឺស្ថិតនៅខាងទីក្រុងកៀវ ហើយទីក្រុង វ៉ាស៊ីនតោននៅពីក្រោយនោះ”។

កាលពីថ្ងៃអាទិត្យ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយជាថ្មីម្តងទៀតថា ទីក្រុងមូស្គូ បើកចំហចំពោះការចរចា ហើយបានស្តីបន្ទោសទីក្រុង កៀវ និងអ្នកគាំទ្រលោកខាងលិចរបស់ខ្លួន ចំពោះកង្វះកិច្ចពិភាក្សា៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ អ៊ុយក្រែន មានបំណងរៀបចំកិច្ចប្រជុំកំពូលសន្តិភាពនៅ UN ក្នុងខែកុម្ភៈ