លោក Zelensky ថា ២០២៣ គឺជាឆ្នាំដែល អ៊ុយក្រែន ផ្ដោតលើសមរភូមិនៅ​ភាគខាងកើត

ប្រធានាធិបតីអ៊ុយក្រែនលោក Volodymyr Zelensky បាននិយាយថា ប្រធានបទសម្រាប់យើងនៅឆ្នាំ ២០២៣ គឺសមរភូមិនៅ​ភាគ​ខាង​កើតដូចជា ទីក្រុង Bakhmut, ទីក្រុង Kreminna និងតំបន់ Donbas ហើយកងកម្លាំង​ និង​សន្តិសុខ​ការពាររបស់យើងបាន​ត្រៀម​ខ្លួន​រួចជាស្រេចសម្រាប់​ឆ្នាំ​ថ្មីនេះ ។

នៅក្នុងសារវីដេអូដែលបានបង្ហោះកាលពីថ្ងៃអង្គារ លោក Zelensky បាននិយាយថា ឆ្នាំ ២០២៣ ក៏ជាឆ្នាំដ៏សំខាន់សម្រាប់អ៊ុយក្រែនផងដែរ ក្នុងការកសាងប្រទេសឡើងវិញ បន្ទាប់ពីលោកបានជួបនិយាយជាមួយប្រធានក្រុមហ៊ុន BlackRock ដែលជាមូលនិធិវិនិយោគដ៏ធំបំផុតរបស់ពិភពលោកអំពីការកសាងឡើងវិញនៃប្រទេសអ៊ុយក្រែន ។

លោក Zelensky បានបន្ថែមថា រដ្ឋាភិបាលអ៊ុយក្រែនក៏កំពុងរៀបចំដើម្បីចូលរួមក្នុងកិច្ចប្រជុំនៃវេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីសនៅខែមករា ឆ្នាំ ២០២៣ ផងដែរ ។

លោកប្រធានាធិបតីបានសង្កត់ធ្ងន់ថា ប្រជាជនអ៊ុយក្រែនត្រូវតែរក្សាការយល់ដឹងរួម អំពីគោលដៅជាតិរបស់ប្រទេសនេះ នៅពេលពួកគេចូលឆ្នាំថ្មី ។

ជាចុងក្រោយលោក Zelensky បាននិយាយថា លោកនឹងបង្ហាញទស្សនៈរបស់លោកក្នុងពេលឆាប់ៗនេះនៅក្នុងសភាស្តីពីការអនុវត្តគោលដៅទាំងនេះ រួមទាំងការរំដោះទឹកដីអ៊ុយក្រែនពីសត្រូវ និងការកសាងប្រទេសឡើងវិញជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី មិនអាចរក្សាទំនាក់ទំនាក់ធម្មតាជាមួយ អាមេរិក ទៀតទេ ក្រោមការ​គ្រប់គ្រងរបស់លោក Biden