ពលរដ្ឋទីក្រុង កៀវ ៣០ ម៉ឺននាក់កំពុងរងាញ័រញាក់ ដោយសារមិនមាន​ម៉ាស៊ីនកម្ដៅខ្លួន និងអគ្គិសនីប្រើប្រាស់

លោក Nikolay Povoroznik នាយករងទី ១ នៃរដ្ឋបាលក្រុងកៀវបាននិយាយកាលពីថ្ងៃពុធថា ប្រជាជនទីក្រុងកៀវជាង ៣០ ម៉ឺននាក់មិនមានអគ្គិសនីប្រើប្រាស់ ហើយអ្នករស់នៅអគារលំនៅដ្ឋានមួយចំនួនកំពុងរងាញ័រញាក់ ដោយសារខ្វះម៉ាស៊ីនកម្ដៅខ្លួន និងទឹក ។

លោក Povoroznik បានប្រាប់សារព័ត៌មាន Klymenko Time ថា “ទោះយ៉ាងណា ថ្មីៗនេះ យើងបានគ្រប់គ្រងស្ថានភាពថាមពលអគ្គិសនីនៅក្នុងទីក្រុង ប៉ុន្តែរហូតមកដល់ពេលនេះ ការបិទចរន្តអគ្គិសនីដើម្បីរក្សាថាមពលនៅតែដំណើរការនៅតាមស្រុកផ្សេងៗក្នុងរដ្ឋធានី ហើយអ្នកប្រើប្រាស់ជាង ៣០ ម៉ឺននាក់នៅទីក្រុងកៀវគឺមិនមានអគ្គីសនីនោះទេ” ។

បន្ថែម​ពី​លើ​នេះ ​បើ​តាម​មន្ត្រីរូបនេះ​បាន​ឲ្យ​ដឹងទៀត​ថា តំបន់មួយចំនួនដែល​ខ្វះ​អគ្គិសនី​ក៏​មិន​មាន​ប្រព័ន្ធ​កម្តៅ ឬ​ទឹក​ដែរ ។ លោកបានពន្យល់ថា “អគារខ្ពស់ៗដែលត្រូវការទឹក គឺមានការលំបាកក្នុងការផ្គត់ផ្គង់ ដោយសារតែម៉ាស៊ីនបូមទឹកមានកម្លាំងខ្សោយ មិនអាចបូមឡើងទៅដល់ឡើយ” ។

កន្លងមកលោកប្រធានាធិបតី Volodymyr Zelensky បាននិយាយថា ៥០ ភាគរយនៃហេដ្ឋារចនាសម្ព័ន្ធថាមពលរបស់ប្រទេសត្រូវបានបំផ្លាញ ខណៈកាលពីថ្ងៃទី ៩ ខែធ្នូ នាយករដ្ឋមន្ត្រីអ៊ុយក្រែន លោក Denis Shmygal បានទទួលស្គាល់ដូចគ្នាថា ការរឹតបន្តឹងលើការប្រើប្រាស់ថាមពលនៅក្នុងប្រទេស នឹងធ្វើឡើងសម្រាប់ពេញមួយរដូវរងា ដោយសារតែស្ថានីយ៍កម្ដៅ និងវារីអគ្គិសនីទាំងអស់ ព្រមទាំងបណ្តាញថាមពលកម្រិតខ្ពស់ចំនួន ៤០ ភាគរយត្រូវបានខូចខាតក្នុងកម្រិតផ្សេងៗគ្នា ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី តបទៅ អ៊ុយក្រែន រឿងឲ្យដកក្រុងមូស្គូចេញពី UNSC ថា “គ្រាន់តែជាឆ្កែព្រុស” ប៉ុណ្ណោះ