មកដឹងចំនួនទឹកប្រាក់ដែលលោកខាងលិចផ្ដល់ឲ្យ អ៊ុយក្រែន ចាប់តាំងពីផ្ទុះ​ការវាយលុករបស់ រុស្ស៊ី

ក្រសួងការពារជាតិរុស្ស៊ីបានប៉ាន់ប្រមាណថា ជំនួយសរុបរបស់លោកខាងលិចដែលផ្ដល់ឲ្យអ៊ុយក្រែនក្នុងឆ្នាំនេះមានចំនួនជិត ១០០ ពាន់លានដុល្លារ ខណៈគ្រាន់តែមន្ទីរបញ្ចកោណតែម្នាក់ឯងបានចំណាយដោយផ្ទាល់យ៉ាងហោចណាស់ ៥០ ពាន់លានដុល្លារទៅហើយដល់អ៊ុយក្រែន ចាប់តាំងពីខែកុម្ភៈ ឆ្នាំ ២០២២ មក ។

ការកើនឡើងជំនួយខ្ទង់រយពាន់លានដុល្លារនេះកើតឡើង បន្ទាប់ពីប្រធានាធិបតីសហរដ្ឋអាមេរិកលោក ចូ បៃដិន បានសន្យាផ្ដល់ជំនួយបន្ថែមទៀតដល់អ៊ុយក្រែនចំនួន ៤៥ ពាន់លានដុល្លារ ហើយប្រសិនបើសំណើរនេះត្រូវបានអនុម័តដោយសភាអាមេរិកនោះ វានឹងក្លាយកញ្ចប់ជំនួយទី ៤ ហើយដែលទីក្រុងវ៉ាស៊ីនតោនផ្ដល់ឲ្យទីក្រុងកៀវ ។

ការផ្ដល់ជំនួយយ៉ាងសន្ធឹកសន្ធាប់ដល់រដ្ឋាភិបាលទីក្រុងកៀវនេះហើយ ទើបធ្វើឲ្យជម្លោះដែនដីដ៏ធំបំផុតរបស់អឺរ៉ុប ចាប់តាំងពីសង្គ្រាមលោកលើកទី ២ មក បានសម្លាប់មនុស្សរាប់ម៉ឺននាក់ ក៏ដូចជាជំរុញមនុស្សរាប់លាននាក់ចាកចេញពីផ្ទះសម្បែង និងបំផ្លិចបំផ្លាញប្រទេសអ៊ុយក្រែន ។

គួរបញ្ជាក់ថា កាលពីថ្ងៃទី២៤ ខែកុម្ភៈ លោក វ្ល៉ាឌីមៀរ ពូទីន បានចាប់ផ្តើមប្រតិបត្តិការយោធាពិសេសមួយនៅអ៊ុយក្រែន ដើម្បីឆ្លើយតបនឹងសំណើសុំជំនួយពីប្រមុខនៃសាធារណរដ្ឋ Donbass ខណៈរហូតមកដល់ពេលនេះ វាមានរយៈពេល ១០ ខែហើយ ។

បន្ទាប់មក លោកខាងលិច​បានដាក់​ទណ្ឌកម្ម​យ៉ាង​ខ្លាំងក្លា​ប្រឆាំង​រុស្ស៊ី និង​បង្កើន​ការផ្គត់ផ្គង់​សព្វាវុធ​ដល់​រដ្ឋាភិបាលទីក្រុងកៀវ ដែល​មានតម្លៃ​រាប់សិប​ពាន់​លាន​ដុល្លារ​ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ លោក ពូទីន អញ្ជើញលោក ស៊ី បំពេញទស្សនកិច្ចផ្លូវរដ្ឋ