ចិន តែងតាំង រដ្ឋមន្ត្រីការបរទេសថ្មី ជំនួសលោក Wang Yi

គណៈកម្មាធិការអចិន្ត្រៃយ៍នៃសភាតំណាងប្រជាជនទូទាំងប្រទេសចិន បានសម្រេចតែងតាំងលោក Qin Gang ដែលបច្ចុប្បន្នជាឯកអគ្គរដ្ឋទូតចិនប្រចាំសហរដ្ឋអាមេរិក ជារដ្ឋមន្ត្រីការបរទេសថ្មីរបស់ខ្លួន ជំនួសលោក Wang Yi ។

លោក Qin ដែលបច្ចុប្បន្នមានវ័យ ៥៦ ឆ្នាំបានបម្រើការជាអ្នកនាំពាក្យក្រសួងការបរទេសចិនអស់រយៈពេលជាង ៨ ឆ្នាំ មុនពេលត្រូវបានតែងតាំងជាអនុរដ្ឋមន្ត្រីការបរទេស នៅក្នុងឆ្នាំ ២០១៨ ហើយលោកត្រូវបានជ្រើសរើសជាឯកអគ្គរដ្ឋទូតរបស់ប្រទេសចិនប្រចាំនៅសហរដ្ឋអាមេរិក ក្នុងឆ្នាំ ២០២១ ។

ចំណែកលោក Wang Yi ជារដ្ឋមន្ត្រីការបរទេសបច្ចុប្បន្នដែលកាន់តំណែងនេះអស់រយៈពេល ៩ ឆ្នាំនឹងចូលកាន់តំណែងជំនួសលោក Yang Jiechi ជាអ្នកការទូតកំពូលរបស់ប្រទេសចិន នៅឯស្ថាប័នធ្វើសេចក្តីសម្រេចរបស់គណបក្ស ដែលជាការិយាល័យនយោបាយ មានសមាជិក ២៤ រូប ។

លោក Wang Yi ត្រូវបានដំឡើងឋានៈឲ្យចូលរួមក្នុងការិយាល័យនយោបាយនេះកាលពីខែតុលា ក្នុងវ័យ ៦៩ ឆ្នាំ បើទោះជានៅក្រោមការគ្រប់គ្រងរបស់គណបក្សនេះ មន្ត្រីកំពូលត្រូវបានគេសន្មត់ថា នឹងចូលនិវត្តន៍នៅអាយុ ៦៨ ឆ្នាំក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកដឹងចំនួនទឹកប្រាក់ដែលលោកខាងលិចផ្ដល់ឲ្យ អ៊ុយក្រែន ចាប់តាំងពីផ្ទុះ​ការវាយលុករបស់ រុស្ស៊ី