លោក Biden ឆ្លើយថា “ទេ” អំពីការធ្វើសមយុទ្ធនុយក្លេអ៊ែររួមគ្នាជាមួយ កូរ៉េខាងត្បូង

ប្រធានាធិបតីអាមេរិកលោក Joe Biden បាននិយាយកាលពីថ្ងៃចន្ទថា ទីក្រុងវ៉ាស៊ីនតោនមិនមានការពិភាក្សាជាមួយកូរ៉េខាងត្បូងស្តីពីសមយុទ្ធនុយក្លេអ៊ែររួមគ្នាប្រឆាំងនឹងការគំរាមកំហែងរបស់កូរ៉េខាងជើងនោះទេ ។

កន្លងមក ប្រធានាធិបតីកូរ៉េខាងត្បូងលោក Yoon Suk Yeol បានប្រាប់កាសែត Chosun Ilbo នៅក្នុងបទសម្ភាសន៍មួយថា ទីក្រុងសេអ៊ូល និងសហរដ្ឋអាមេរិកកំពុងពិភាក្សាអំពីការធ្វើសមយុទ្ធនុយក្លេអ៊ែររួមគ្នា ដើម្បីត្រៀមខ្លួនសម្រាប់ការបង្កើនប្រសិទ្ធភាពទប់ស្កាត់ការវាយប្រហាររបស់សត្រូវ ខណៈទីក្រុងវ៉ាស៊ីនតោនក៏បង្ហាញភាពវិជ្ជមានអំពីបញ្ហានេះផងដែរ ។

ទោះជាយ៉ាងណាក៏ដោយ លោក Biden បានឆ្លើយយ៉ាងខ្លីថា “ទេ” នៅពេលត្រូវបានអ្នកសារព័ត៌មានសួរថាតើប្រទេសទាំងពីរកំពុងពិភាក្សាគ្នាអំពីសមយុទ្ធនុយក្លេអ៊ែររួមគ្នានាពេលនេះដែរឬទេ ដែលផ្ទុយទាំងស្រុងទៅនឹងការលើកឡើងរបស់សមភាគីកូរ៉េខាងត្បូង ។

គួរបញ្ជាក់ថា ភាពតានតឹងនៅលើឧបទ្វីបកូរ៉េ បានកើនឡើងជាថ្មីម្តងទៀត បន្ទាប់ពីកូរ៉េខាងជើង បានបាញ់មីស៊ីលជាច្រើនគ្រាប់កាលពីឆ្នាំមុន រួមទាំងមីស៊ីលផ្លោងអន្តរទ្វីបផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ តើ អាមេរិក ជាប្រទេសប្រជាធិបតេយ្យ ឬផ្ដាច់ការលាក់មុខ ក្រោយ Elon Musk ថាបានជះលុយរាប់លានដុល្លារលើ Twitter ដើម្បីតាមដានព័ត៌មាន ប្រជាជនខ្លួន?