ត្រាំ ប្រកាសកម្ចាត់ក្រុមជួញដូរគ្រឿងញៀន បើលោកជាប់ឆ្នោតម្ដងទៀត

លោក ដូណាល់ ត្រាំ បានបញ្ជាក់កាលពីថ្ងៃព្រហស្បតិ៍ថា បើសិនជាលោកជាប់ឆ្នោតជាប្រធានាធិបតីម្តងទៀត លោកនឹងកម្ចាត់ក្រុមជួញដូរគ្រឿងញៀននៅអាមេរិក មិនឲ្យពួកគេមានក្តីសុខឡើយ ។

ថ្លែងតាមរយៈវីដេអូមួយ លោក ត្រាំ បាននិយាយថា ក្រុមជួញដូរគ្រឿងញៀនកំពុងធ្វើសង្រ្គាមនៅអាមេរិក ហើយឥឡូវនេះ គឺដល់ពេលសម្រាប់អាមេរិកដើម្បីធ្វើសង្គ្រាមលើក្រុមជួញដូរវិញម្តងហើយ ។

លោកបន្ថែមថា​ ក្រុមជួញដូរគ្រឿងញៀន និងសម្ព័ន្ធមិត្តរបស់ពួកគេនៅក្នុងអាណត្តិរដ្ឋបាលលោក ចូ បៃដិន បានអនុវត្តសកម្មភាពខុសច្បាប់យ៉ាងគឃ្លើន ហើយមិនតែប៉ុណ្ណោះ គ្រួសារ និងប្រជាជនស្លូតត្រង់ជាច្រើន ត្រូវបានបំផ្លាញ ដោយសារឥទ្ធិពលគ្រឿងញៀន ហើយនៅពេលដែលលោកត្រឡប់មកកាន់សេតវិមានវិញ ស្តេចគ្រឿងញៀន និងអ្នកជួញដូរដ៏កាចសាហាវ នឹងមិនបានដេកលក់ស្រួលទៀតឡើយ លោកនឹងកម្ចាត់ពួកគេ ដូចតាមកម្ចាត់ក្រុម ISIS អញ្ចឹង ។

បច្ចុប្បន្ន អតីតប្រធានាធិបតីអាមេរិក ដូណាល់ ត្រាំ បានត្រលប់ចូលក្នុងឆាកនយោបាយម្តងទៀត​ ហើយក៏កំពុងធ្វើការឃោសនាប្រជែងតំណែងជាប្រធានាធិបតីអាមេរិកផងដែរ នៅក្នុងការបោះឆ្នោតឆ្នាំ ២០២៤ ។

គួរបញ្ជាក់ថា ទាក់ទិនជាមួយគ្រឿងញៀននេះដែរ កាលពីឆ្នាំ ២០២១​ កន្លងទៅ មន្ត្រីព្រំដែនអាមេរិកបានរឹបអូសថ្នាំញៀនជាង ១០០,២៤៤ គីឡូក្រាម ដែលជាការកើនឡើងជិត ៤០ ភាគរយ បើធៀបនឹងឆ្នាំ ២០១៩ ៕

ប្រេសម្រួលដោយ ៖ នាង រតនៈ

ប្រភព ៖ Sputnik

ចុចអាន ៖ អាមេរិក ផ្ដល់ប្រាក់ ១០ លានដុល្លារសម្រាប់ព័ត៌មាននាំទៅដល់ការចាប់ខ្លួន អ្នកវាយប្រហារភេរវកម្មនៅ កេនយ៉ា ឆ្នាំ២០២០