ព័ត៌មានអន្ដរជាតិ

ផ្ទុះការបាញ់ប្រហារសម្លាប់មនុស្សនៅ ម៉ិកស៊ិក ក្រោយចាប់ខ្លួនកូនស្ដេចគ្រឿងញៀន El Chapo

បានផុស

២ years មុន

នៅ

ថ្ងៃសុក្រ ៦ មករា ២០២៣

ដោយ

លោក Ruben Rocha Moya អភិបាលរដ្ឋ Sinaloa នៃប្រទេសម៉ិកស៊ិកបាននិយាយកាលពីថ្ងៃព្រហស្បតិ៍ថា មនុស្សម្នាក់បានស្លាប់ និង ២៧ នាក់បានរងរបួសនៅក្នុងការបាញ់ប្រហារគ្នាជាមួយសមាជិកនៃក្រុមជួញដូរគ្រឿងញៀន Sinaloa Cartel ក្នុងទីក្រុង Culiacan បន្ទាប់ពីការចាប់ខ្លួនស្ដេចគ្រឿងញៀន Ovidio Guzman Lopez ។

លោក Ovidio Guzman Lopez កូនប្រុសស្ដេចគ្រឿងញៀន El Chapo

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលរដ្ឋបានប្រាប់ទូរទស្សន៍ Formula ថា “ហេតុការណ៍នេះបានបង្ខំឲ្យអាជ្ញាធរបិទផ្លូវនៅទីក្រុង Culiacan, ទីក្រុង Los Mochis និងទីក្រុង Esquinapa ដើម្បីទប់ទល់នឹងក្រុមជួញដូរគ្រឿងញៀន ប៉ុន្តែជាអកុសលទាហានឆ្មាំជាតិម្នាក់ត្រូវបានសម្លាប់ ខណៈ ២៧ នាក់បានរងរបួស ដោយគ្រាប់កាំភ្លើងនៅក្នុងការប៉ះទង្គិចគ្នានេះ” ។

ទន្ទឹមនោះ រដ្ឋមន្ត្រីការពារជាតិម៉ិកស៊ិកលោក Luis Cresencio Sandoval Gonzalez បាននិយាយថា លោក Guzman Lopez ដែលជាកូនប្រុសរបស់ស្តេចគ្រឿងញៀន Joaquin “El Chapo” Guzman ត្រូវបានចាប់ខ្លួននៅទីក្រុង Culiacan ហើយក្រោយមកត្រូវបានបញ្ជូនទៅទីក្រុងម៉ិកស៊ិក ខណៈការចាប់ខ្លួននេះបានជំរុញឲ្យផ្ទុះការបាញ់ប្រហារដោយកាំភ្លើងជាមួយក្រុមជួញដូរគ្រឿងញៀនក្នុងទីក្រុង ។

យោងតាមអាជ្ញាធរមូលដ្ឋានបានឲ្យដឹងថា សមាជិកក្រុមជួញដូរគ្រឿងញៀនបានលួច និងដុតរថយន្តប្រហែល ២៥០ គ្រឿង ខណៈទីភ្នាក់ងារសន្តិសុខបានបិទផ្លូវយ៉ាងហោចណាស់ ១៨ ខ្សែ និងបញ្ឈប់ប្រតិបត្តិការនៅឯព្រលានយន្តហោះចំនួន ៣ ដោយសារតែកន្លែងខ្លះត្រូវបានភ្លើងឆេះ ៕

សូមទស្សនាវីដេអូ!