ថៃចុះផ្សាយ MV ប្រវត្តិសាស្ត្របង្ហាញពីជីវិតរបស់ស្ត្រីទី១កម្ពុជា ក្នុងសម័យខ្មែរក្រហម

ប្រភពព័ត៌មានបានឱ្យដឹងថា ក្រសួងវប្បធម៌ និងវិចិត្រសិល្បៈកម្ពុជា គ្រោងនឹងចេញផ្សាយខ្សែវីដេអូប្រវត្តិសាស្ត្រអំពីទុក្ខសោករបស់ស្ត្រីទី១កម្ពុជាក្នុងរបបខ្មែរក្រហម នៅថ្ងៃទី៧ ខែមករានេះ។

រដ្ឋមន្ត្រីក្រសួងវប្បធម៌ និងវិចិត្រសិល្បៈកម្ពុជា នឹងអញ្ជើញជាអធិបតីក្នុងពិធីសម្ពោធវីដេអូចម្រៀងនៅសាលមហោស្របសន្និបាតចតុមុខក្នុងរាជធានីភ្នំពេញ ដែលវីដេអូចម្រៀងនេះផលិតដោយសមាគមសិល្បករខ្មែរ ដឹកនាំដោយនាយកគ្រប់គ្រងកម្មវិធីដ៏ល្បីមួយរូបរបស់កម្ពុជា គឺលោក ហ្វៃ សំអាង ដែលទទួលបានការគាំទ្រ (ឧបត្ថម្ភ) ក្នុងការថតពីលោក ឡេង ណាវ៉ាត់ត្រា ម្ចាស់ក្រុមហ៊ុនអចលនទ្រព្យខ្នាតធំ និងជាម្ចាស់ផលិតកម្ម Galaxy Navatra។

ខ្សែវីដេអូនេះបានរៀបរាប់អំពីទុក្ខសោកនិងការតស៊ូរបស់ស្ត្រីទី១ សម្តេចកិត្តិព្រឹទ្ធបណ្ឌិត ប៊ុនរ៉ានី នៅគ្រាដែលស្វាមីរបស់សម្តេច គឺនាយករដ្ឋមន្ត្រីសម្តេចតេជោ ហ៊ុន សែន ត្រូវចាកចេញពីភរិយាដើម្បីទៅបង្កើតកងកម្លាំងយោធាបណ្តេញពួកខ្មែរក្រហម។

យោងតាមប្រព័ន្ធផ្សព្វផ្សាយកម្ពុជាបានឱ្យដឹងថា ការចេញផ្សាយវីដេអូចម្រៀងប្រវត្តិសាស្ត្រនេះ នឹងផ្សាយក្នុងពេលដំណាលគ្នានៅលើទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន ទូរទស្សន៍ជាតិកម្ពុជា (ទទក) Fresh News Channel និងស្ថានីយ៍ទូរទស្សន៍បាយ័ន (BTV)៕

ប្រែសម្រួល៖ គង់ សំអាន

ប្រភព៖ Mgronline