តើ ថៃ ដាក់វិធានការរឹតត្បិត កូវីដ លើអ្នកទេសចរមកពី ចិន ទេ?

រដ្ឋាភិបាលថៃនឹងមិនដាក់វិធានការរឹតត្បិតលើអ្នកដំណើរមកពីប្រទេសចិននោះទេ បើទោះបីជាចិនកំពុងផ្ទុះឆ្លងកូវីដនៅក្នុងប្រទេសសាជាថ្មីក៏ដោយ ។

រដ្ឋមន្ត្រីសុខភាពសាធារណៈថៃលោក Anutin Charnvirakul បានកត់សម្គាល់នៅក្នុងសន្និសីទសារព័ត៌មានកាលពីពេលថ្មីៗនេះថា ប្រទេសថៃមិនបានដាក់ការរឹតត្បិតកូវីដលើអ្នកទេសចរចិនចាប់តាំងពីឆ្នាំមុនមកម្ល៉េះ ។

ថៃមិនបានស្នើសុំការធ្វើតេស្តអវិជ្ជមានលើអ្នកទេសចរចិនដែលមកដល់ប្រទេសនោះទេ ហើយគោលនយោបាយនេះក៏នឹងបន្តសម្រាប់អ្នកទេសចរមកពីប្រទេសផ្សេងទៀតផងដែរ ។

លោករដ្ឋមន្ត្រីបាននិយាយថា នេះគឺជាឱកាសមួយដើម្បីបើកសេដ្ឋកិច្ចរបស់ប្រទេសថៃឡើងវិញ និងសងការខាតបង់ដែលបានរងទុក្ខ ក្នុងអំឡុងពេល ៣ ឆ្នាំកន្លងមកនេះ ។

គួរបញ្ជាក់ថា នៅក្នុងឆ្នាំ ២០១៩ អ្នកទេសចរចិនជាង ១១ លាននាក់បានមកទស្សនាប្រទេសថៃ ពោលចំនួននេះគឺជិត ៣០​ ភាគរយនៃភ្ញៀវទេសចរបរទេសដែលចូលមកប្រទេសនេះ ខណៈរដ្ឋាភិបាលថៃក៏បង្ហាញក្ដីសង្ឃឹមដែរថា ភ្ញៀវទេសចរចិននឹងជួយឲ្យឧស្សាហកម្មទេសចរណ៍ថៃរស់ឡើងវិញ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អតីតមេទ័ព ណាតូ ព្យាករណ៍បទឈប់បាញ់នៅ អ៊ុយក្រែន