រុស្ស៊ី ចោទ អ៊ុយក្រែន ថា មិនគោរពបទឈប់បាញ់ ហើយថែមទាំងវាយ​ប្រហារ​រាប់រយលើកលើទីតាំងយោធារបស់ខ្លួន

ក្រសួងការពារជាតិរុស្ស៊ីបាននិយាយកាលពីថ្ងៃអាទិត្យថា កងទ័ពអ៊ុយក្រែនបានធ្វើការវាយប្រហារដោយកាំភ្លើងធំរាប់រយដងលើការតាំងទីលំនៅ និងទីតាំងយោធារបស់រុស្ស៊ី ក្នុងអំឡុងពេលបទឈប់បាញ់ជាឯកតោភាគីកាលពីថ្ងៃទី ៦-៧ ខែមករា ។

យោងតាមក្រសួងការពារជាតិបានឲ្យដឹងទៀតថា កងទ័ពអ៊ុយក្រែនបានធ្វើការវាយប្រហារដោយកាំភ្លើងធំប្រហែល ៣៧០ លើក ក្នុងនោះមានគ្រាប់ផ្លោងធំជាង ១៦០ គ្រាប់ និងរ៉ុកកែត ២០ គ្រាប់មកលើទីតាំងរបស់កងទ័ពរុស្ស៊ីនៅសាធារណរដ្ឋប្រជាមានិត Donetsk និង Lugansk, តំបន់ Zaporozhye និង Kherson ហើយពួកគេមិនបានគោរពបទឈប់បាញ់នោះទេ ។

ក្រសួងការពារជាតិ​បាន​បញ្ជាក់ថា ទោះជាយ៉ាងណាក៏ដោយ កងកាំភ្លើងធំ​អ៊ុយក្រែន​ដែល​កំណត់​គោលដៅលើការ​តាំងទីលំនៅ​របស់រុស្ស៊ី ក៏ត្រូវបានកម្ទេច​ដោយ​ការ​បាញ់​សងសឹក​ពីសំណាក់​ទាហាន​រុស្ស៊ីផងដែរ ។

កាលពីថ្ងៃព្រហស្បតិ៍ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជាឲ្យក្រសួងការពារជាតិ កំណត់បទឈប់បាញ់រយៈពេល ៣៦ ម៉ោងនៅសមរភូមិជួរមុខក្នុងប្រទេសអ៊ុយក្រែន ចាប់ពីថ្ងៃទី ៦-៧ ខែមករា ដើម្បីអនុញ្ញាតឲ្យគ្រិស្តបរិស័ទនៅក្នុងតំបន់នៃអរិភាព បានចូលក្នុងព្រះវិហារដើម្បីប្រារព្ធពិធីបុណ្យគ្រិស្តអូស្សូដក់ ។

ប៉ុន្តែលោក Olexiy Danilov លេខាធិការនៃក្រុមប្រឹក្សាសន្តិសុខ និងការពារជាតិអ៊ុយក្រែន បានច្រានចោលសំណើបទឈប់បាញ់នេះ ហើយទាហានអ៊ុយក្រែននៅតែបន្តបាញ់ផ្លោងមកលើតំបន់ Donbas បើទោះបីជាមានបទឈប់បាញ់ចូលជាធរមានក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក Zelensky ដាក់គោលដៅបញ្ចប់សង្គ្រាមជាមួយ រុស្ស៊ី ឆ្នាំនេះ