តៃវ៉ាន់​ ថ្កោលទោស​ចិន​ ចំពោះ​សមយុទ្ធ​យោធាចុងក្រោយ​

នៅថ្ងៃចន្ទទី០៩ខែមករានេះ កោះតៃវ៉ាន់ បានថ្កោលទោសចិន ចំពោះការធ្វើសមយុទ្ធយោធាលើកទី២របស់ខ្លួនជុំវិញកោះនេះក្នុងរយៈពេលតិចជាងមួយខែ ដោយក្រសួងការពារជាតិនិយាយថា ខ្លួនបានឃើញយន្តហោះចិនចំនួន ៥៧ គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសចិន បានចាត់ទុកកោះតៃវ៉ាន់ថាជាទឹកដីរបស់ខ្លួន ហើយបាននិងកំពុងបង្កើនសម្ពាធផ្នែកយោធា នយោបាយ និងសេដ្ឋកិច្ច។

ទីបញ្ជាការភូមិភាគខាងកើតនៃកងទ័ពរំដោះប្រជាជនចិន បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃអាទិត្យថា កងកម្លាំងរបស់ខ្លួន បានរៀបចំការល្បាតត្រៀមប្រយុទ្ធរួមគ្នា និងសមយុទ្ធប្រយុទ្ធជាក់ស្តែងនៅក្នុងសមុទ្រ និងដែនអាកាសជុំវិញកោះតៃវ៉ាន់ ដោយផ្តោតលើការវាយប្រហារដីគោក និងការវាយលុកតាមសមុទ្រ។

គោលបំណងនៃសមយុទ្ធនេះ គឺដើម្បីសាកល្បងសមត្ថភាពប្រយុទ្ធរួមគ្នា និងប្រឆាំងយ៉ាងម៉ឺងម៉ាត់ចំពោះសកម្មភាពបង្កហេតុរបស់កងកម្លាំងខាងក្រៅ និងកងកម្លាំងផ្តាច់ខ្លួនឯករាជ្យតៃវ៉ាន់។

ទោះបីជាយ៉ាងណាក៏ដោយ ការិយាល័យប្រធានាធិបតីតៃវ៉ាន់បានអះអាងថា ប្រទេសចិនកំពុងធ្វើការចោទប្រកាន់ដោយគ្មានមូលដ្ឋាន ហើយបានថ្កោលទោសយ៉ាងដាច់អហង្ការចំពោះសមយុទ្ធនេះ ដោយនិយាយថា សន្តិភាព និងស្ថិរភាពនៃច្រកសមុទ្រតៃវ៉ាន់ និងតំបន់គឺជាការទទួលខុសត្រូវរួមរបស់តៃវ៉ាន់ និងចិន។

ការិយាល័យបាននិយាយនៅក្នុងសេចក្តីថ្លែងការណ៍មួយថា ជំហររបស់តៃវ៉ាន់គឺច្បាស់ណាស់ ដោយក្នុងនោះខ្លួននឹងមិនធ្វើឲ្យជម្លោះកើនឡើង ឬបង្កជម្លោះណាមួយនោះទេ ប៉ុន្តែនឹងការពារយ៉ាងរឹងមាំនូវអធិបតេយ្យភាព និងសន្តិសុខរបស់ខ្លួន៕

ប្រែសម្រួល៖ Vann Vann

ប្រភព៖ CNA

ចុចអាន៖ កងទ័ពចិន ធ្វើសមយុទ្ធ ក្នុងដែនទឹក និងដែនអាកាស តៃវ៉ាន់