ផ្ទុះ Power Bank ក្នុងយន្តហោះសិង្ហបុរី អ្នកដំណើរព្រលឹងចុងសក់!

អ្នកដំណើរ២នាក់បានរងរបួស បន្ទាប់ពី Power Bank ផ្ទុះឆេះលើជើងហោះហើររបស់ក្រុមហ៊ុន Scoot ខណៈយន្តហោះហៀបនឹងហោះឡើងឆ្ពោះទៅកាន់ប្រទេសសិង្ហបុរី កាលពីថ្ងៃអង្គារទី១០ខែមករា។

ឆ្លើយតបទៅនឹងសំណួររបស់ CNA, ក្រុមហ៊ុន Scoot បាននិយាយថា “ជើងហោះហើរ TR993 ដែលនឹងហោះចេញពីទីក្រុងតៃប៉ិ ទៅកាន់ប្រទេសសិង្ហបុរីកាលពីថ្ងៃទី១០ខែមករា បានបង្វែរក្បាលត្រលប់ទៅច្រកចូលព្រលានវិញ បន្ទាប់ពី power bank របស់អ្នកដំណើរម្នាក់ផ្ទុះឆេះ ខណៈយន្តហោះស្ថិតនៅលើដី”។

យោងតាមក្រុមហ៊ុន Scoot, ម្ចាស់ power bank និងដៃគូរបស់គាត់ បានរងការរលាកម្រាមដៃតិចតួច ហើយត្រូវបានគេផ្តល់ជំនួយផ្នែកវេជ្ជសាស្រ្តដល់ពួកគេ។

ផ្អែកលើរបាយការណ៍របស់ប្រព័ន្ធផ្សព្វផ្សាយក្នុងស្រុក, យន្តហោះរបស់ក្រុមហ៊ុន Scoot កំពុងរំកិល ត្រៀមហោះឡើងនៅអាកាសយានដ្ឋាន Taoyuan ក្នុងទីក្រុងតៃប៉ិ ពេលដែលអាជ្ញាធរអាកាសយានដ្ឋាន ត្រូវបានជូនដំណឹងថាមានភ្លើងឆេះក្នុងកាប៊ីននៅម៉ោងប្រហែល ៧:៤០នាទីយប់។

អាជ្ញាធរអាកាសយានដ្ឋាន បានបញ្ជូនក្រុមពន្លត់អគ្គិភ័យទៅ ហើយយន្តហោះត្រូវបានអនុញ្ញាតឲ្យត្រលប់ទៅច្រកចូលព្រលានវិញ បន្ទាប់ពីភ្លើងត្រូវបានពន្លត់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ អ្នកដំណើរមួយយន្តហោះ ជិះចេញពីព្រលាននៅឆ្នាំ២០២៣ តែចុះចតនៅឆ្នាំ២០២២