ចិន ផ្អាកផ្តល់ទិដ្ឋាការដល់ប្រទេសអាស៊ីចំនួន ២ ដែលទារលទ្ធផលតេស្តកូវីដ​លើអ្នកទេសចរខ្លួន

កាលពីថ្ងៃអង្គារ ប្រទេសចិនប្រកាសផ្អាកផ្តល់ទិដ្ឋាការដល់ជនជាតិជប៉ុន និងកូរ៉េខាងត្បូង ពីព្រោះតែប្រទេសទាំងពីរនេះបានទាមទាររកលទ្ធផលតេស្តអវិជ្ជមានកូវីដ ១៩ ពីអ្នកដំណើរដែលមកពីប្រទេសចិន ។

ពាក់ព័ន្ធនឹងបញ្ហានេះដែរ រដ្ឋមន្ត្រីការបរទេសជប៉ុនលោក Hayashi Yoshimasa បាននិយាយថា ជប៉ុនកំពុងអនុវត្តវិធានការនៅច្រកចូលយ៉ាងប្រុងប្រយ័ត្ន ដើម្បីធានាបានលំហូររបស់ភ្ញៀវអន្តរជាតិ ។ ប៉ុន្តែវាជារឿងគួរឲ្យសោកស្ដាយបំផុតដែលប្រទេសចិនបែរជារឹតបន្តឹងការចេញទិដ្ឋាការដល់ជប៉ុនសម្រាប់ហេតុផលផ្សេង ក្រៅពីមេរោគឆ្លងទៅវិញ ។

រីឯអ្នកនាំពាក្យក្រសួងការបរទេសចិន លោក Wang Wenbin និយាយថា វាគួរឲ្យសោកស្ដាយ ដែលប្រទេសមួយចំនួនតូច ដាក់ការរឹតត្បិតតែមកលើប្រទេសចិន ។ លោកចាត់ទុកវិធានការនេះថា ជាការរើសអើង ហើយជាការឆ្លើយតបចិនបានធ្វើសកម្មភាពផ្អាកទិដ្ឋាការលើប្រទេសទាំងពីរនេះ ។

បច្ចុប្បន្ន មុនចូលប្រទេសជប៉ុន អ្នកដំណើរមកពីប្រទេសចិនដីគោកទាំងអស់ត្រូវផ្តល់ភស្តុតាងនៃលទ្ធផលតេស្តអវិជ្ជមានកូវីដក្នុងរយៈពេល ៧២ ម៉ោងមុនពេលចេញដំណើរ ហើយជប៉ុនក៏​កំពុង​រៀបចំ​ផែនការ​វិធានការ​ស្រដៀង​គ្នា​នេះផងដែរ ​សម្រាប់​អ្នក​ដែល​មក​ពី​ម៉ាកាវ​ ។

គួរបញ្ជាក់ថា អ្នកដំណើរដែលមកពីចិន ត្រូវបាន​ប្រទេសមួយចំនួន មិនថាតែនៅអាស៊ី ឬអឺរ៉ុបឡើយ គឺទាមទារឲ្យបង្ហាញលិខិតធ្វើតេស្តជាមុនសិន ទើបអាចចូលបាន ប៉ុន្តែក៏មានប្រទេសក្នុងអាស៊ានមួយចំនួនផងដែរ ប្រកាសបើកជំហរស្វាគមន៍ទេសចរចិន ដោយមិនចាំបាច់ទាមទារអ្វីទាំងអស់ ៕

ប្រែសម្រួលដោយ ៖ នាង រតនៈ

ប្រភព ៖​ NHK

ចុចអាន ៖ ថៃ ទទួលស្វាគមន៍អ្នកទេសចរ ចិន ក្រុមដំបូងចូលក្នុងប្រទេសយ៉ាងឱឡារិក