អាមេរិក ដាក់ការសង្ស័យថា ចិន ជិតដល់ពេលលុកលុយ តៃវ៉ាន់ ហើយ

រដ្ឋមន្ត្រីការពារជាតិអាមេរិក លោក Lloyd Austin បានដាក់ការសង្ស័យថា ការលុកលុយរបស់ចិនមកលើកោះតៃវ៉ាន់គឺជិតដល់ពេលហើយ ដូចអ្វីដែលលោកបានថ្លែងនៅក្នុងសន្និសីទសារព័ត៌មាន បន្ទាប់ពីកិច្ចប្រជុំរវាងប្រមុខការពារជាតិ និងគោលនយោបាយការបរទេសអាមេរិក និងជប៉ុនអញ្ចឹង ។

លោក Austin បាន​ចង្អុល​បង្ហាញ​ថា​ “​អ្វី​ដែល​យើង​កំពុង​ឃើញ​នាពេល​ថ្មីៗ​នេះ​គឺជា ​អាកប្បកិរិយា​ញុះញង់​ខ្លាំង​បំផុត​របស់កងកម្លាំង​របស់​ចិន ជាពិសេសសកម្មភាពដែនអាកាស និងការធ្វើនាវាចរលើផ្ទៃទឹកទាំងនៅច្រកសមុទ្រ និងជុំវិញកោះតៃវ៉ាន់ ហើយខ្ញុំ​សង្ស័យ​យ៉ាង​ខ្លាំងថា ​រឿងលុកលុយលើតៃវ៉ាន់នឹងកើតឡើង” ។

ទន្ទឹមនោះ លោក Austin ក៏​បាន​អំពាវនាវ​ដល់​ប្រទេស​ចិន​ឲ្យ​រក្សា​បណ្តាញ​ទំនាក់ទំនង​បើកចំហរទាំងអស់ផងដែរ ព្រោះថាកិច្ច​សន្ទនា​នោះ​មាន​សារៈ​សំខាន់​​ខ្លាំងណាស់ ។

ភាពតានតឹងរវាងទីក្រុងប៉េកាំង និងតៃប៉ិកាន់តែក្ដីដូចបាយពុះ បន្ទាប់ពីដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi ទៅកាន់កោះនេះកាលពីខែសីហា ។

ពាក់ព័ន្ធនឹងបញ្ហានេះដែរ ប្រទេសចិនបានព្រមានម្តងហើយម្តងទៀតថា នឹងប្រើប្រាស់មធ្យោបាយចាំបាច់ទាំងអស់ដើម្បីបង្កើតការគ្រប់គ្រងពេញលេញលើកោះនេះ ប៉ុន្តែទោះយ៉ាងណាចិននៅតែទទូចថា ក៏នឹងស្វែងរកដំណោះស្រាយតាមលក្ខណៈការទូតផងដែរ ។

កាលពីថ្ងៃចន្ទ ទីក្រុងប៉េកាំងបានប្រកាសសមយុទ្ធយោធាថ្មីមួយនៅជិតកោះតៃវ៉ាន់ ដើម្បីឆ្លើយតបទៅនឹងដំណើរទស្សនកិច្ចរបស់សមាជិកសភាអាល្លឺម៉ង់ និងលីទុយអានី ទៅកាន់កោះនេះ ។ យោងតាមអ្នកនាំពាក្យយោធាចិន បានឲ្យដឹងថា សមយុទ្ធនេះនឹងរួមបញ្ចូលទាំងសមយុទ្ធដែនសមុទ្រ និងលំហអាកាស ហើយនឹងផ្តោតលើការវាយលុកតាមដីគោក និងតាមអាកាស ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ចិន មិនអនុញ្ញាតឲ្យតំបន់ប៉ាស៊ីហ្វិកក្លាយជាចំណុចក្ដៅសម្រាប់ជម្លោះភូមិ​សាស្រ្តនយោបាយនោះទេ