ដឹងទេ យន្តហោះដែលធ្លាក់នៅ នេប៉ាល់ មានអាយុកាលប៉ុន្មានឆ្នាំ?

យោងតាមទិន្នន័យរបស់កម្មវិធីតាមដានការហោះហើរបានឲ្យដឹងថា យន្តហោះធុន ATR 72-500 របស់ក្រុមហ៊ុនអាកាសចរណ៍ Yeti Airline របស់ប្រទេសនេប៉ាល់ដែលធ្លាក់កាលពីថ្ងៃអាទិត្យ មានអាយុកាលចាស់មែនទែនគឺ ១៥ ឆ្នាំទៅហើយ ។

យន្តហោះធុននេះត្រូវបានគេដឹងថា បំពាក់ដោយឧបករណ៍បញ្ជូនរលកសញ្ញាចាស់ៗជាមួយនឹងទិន្នន័យដែលមិនគួរឲ្យទុកចិត្តបានឡើយ ហើយនៅក្នុងសេចក្ដីថ្លែងការណ៍មួយរបស់ក្រុមហ៊ុន ATR ដែលជាក្រុមហ៊ុនផលិតយន្តហោះបារាំង-អ៊ីតាលី បាននិយាយថា ពួកគេក៏កំពុងធ្វើការស៊ើបអង្កេតលើការធ្លាក់នេះផងដែរ ។

មនុស្ស ៦៨ នាក់បានស្លាប់ នៅពេលជើងហោះហើរចេញពីទីក្រុង Kathmandu ឆ្ពោះទៅកាន់ទីក្រុងទេសចរណ៍ Pokhara បានធ្លាក់ និងឆេះកាលពីថ្ងៃអាទិត្យ ខណៈគេមិនទាន់ដឹងច្បាស់ថាតើ យន្តហោះនេះធ្លាក់បណ្តាលមកពីមូលហេតុអ្វីនោះទេ ។

ប៉ុន្តែឧបទ្ទវហេតុធ្លាក់យន្តហោះ មិនមែនជារឿងចម្លែកទេនៅក្នុងប្រទេសនេប៉ាល់ ។ ប្រជាជាតិហិមាល័យមួយនេះ សម្បូរទៅដោយភ្នំ ហើយមានទីតាំងពិបាកធ្វើដំណើរបំផុត ខណៈកង្វះការវិនិយោគលើយន្តហោះថ្មី និងបទប្បញ្ញត្តិមិនល្អ ក៏ត្រូវបានស្តីបន្ទោសផងដែរនាពេលកន្លងមក ។

ពាក់ព័ន្ធនឹងសោកនាដកម្មនេះដែរ ប្រទេសនេប៉ាល់ក៏បានប្រកាសកាន់ទុក្ខសម្រាប់ជនរងគ្រោះនៃគ្រោះមហន្តរាយផ្លូវអាកាសដ៏អាក្រក់បំផុតមិនធ្លាប់មានរបស់ប្រទេសក្នុងរយៈពេល ៣ ទសវត្សរ៍ចុងក្រោយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ The Guardian

ចុចអាន ៖ នេប៉ាល់ កាន់ទុក្ខជនរងគ្រោះ ក្នុងសោកនាដកម្មដែនអាកាសអាក្រក់បំផុត នារយៈពេល៣ទសវត្សរ៍