មកដឹងចំនួនទ័ព អ៊ុយក្រែន ដែលគ្រូយោធា អាមេរិក បង្ហាត់ផ្ទាល់ដៃដើម្បីទប់ រុស្ស៊ី

ប្រព័ន្ធផ្សព្វផ្សាយសហរដ្ឋអាមេរិកបានរាយការណ៍ថា ទាហានអ៊ុយក្រែនជាង ៣,១០០ នាក់ហើយបានទទួលការបណ្ដុះបណ្ដាលផ្ទាល់ដៃដោយគ្រូយោធាអាមេរិក ដើម្បីឲ្យចេះប្រើប្រាស់អាវុធ និងឧបករណ៍មួយចំនួនផ្សេងទៀតដើម្បីទប់ទល់ជាមួយនឹងរុស្ស៊ី ។

យោងតាមលោកឧត្តមសេនីយ៍ Mark Milley ប្រធានអគ្គសេនាធិការចម្រុះអាមេរិកបាននិយាយកាលពីពេលថ្មីៗនេះថា ការហ្វឹកហ្វឺនទ័ពអ៊ុយក្រែនពីសំណាក់យោធាអាមេរិក គឺផ្ដោតលើការប្រយុទ្ធថ្មី និងពង្រីកនៃកងកម្លាំងអ៊ុយក្រែននៅលើទឹកដីអឺរ៉ុប ចំពេលប្រតិបត្តិការយោធាពិសេសដែលកំពុងបន្តរបស់ទីក្រុងមូស្គូនៅអ៊ុយក្រែន ។

ទន្ទឹមនោះ ការបង្ហាត់បង្រៀននេះក៏រួមបញ្ចូលទាំងការប្រើប្រាស់ ក៏ដូចជាការថែទាំអាវុធទំនើបៗដូចជា កាំភ្លើងបាញ់ផ្លោង រថក្រោះ ជាពិសេសគឺការបង្រៀនឲ្យចេះបាញ់ប្រព័ន្ធ HIMARS និងខែលការពារមីស៊ីល Patriot ដែលបណ្ដាប្រទេសលោកខាងលិចបញ្ជូនទៅឲ្យអ៊ុយក្រែន ។

ចាប់តាំងពីរុស្ស៊ីបានចាប់ផ្តើមប្រតិបត្តិការយោធាពិសេសរបស់ខ្លួនក្នុងប្រទេសអ៊ុយក្រែននៅថ្ងៃទី ២៤ ខែកុម្ភៈ ឆ្នាំ ២០២២ មក, សហរដ្ឋអាមេរិក និងសម្ព័ន្ធមិត្តបាននឹងកំពុងផ្តល់ជំនួយមនុស្សធម៌ យោធា និងហិរញ្ញវត្ថុដល់ទីក្រុងកៀវ ខណៈទីក្រុងមូស្គូ​ក៏បានរិះគន់​លំហូរ​នៃ​អាវុធ​ទៅ​កាន់​អ៊ុយក្រែននេះដែរថា គឺជាការចាក់សាំងបន្ថែមលើភ្លើងកំពុងឆេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប្រធានាធិបតីក្រូអាតថា អាមេរិក និងណាតូ កំពុងធ្វើសង្គ្រាមប្រូកស៊ីប្រឆាំង រុស្ស៊ី លើទឹកដី អ៊ុយក្រែន